Bishkek ostonasida qulagan samolyotda texnik nosozliklar bo‘lmagan. Bu haqda Davlatlararo aviatsiya qo‘mitasi (DAQ) komissiyasi raisi Leonid Kashirskiy ma’lum qildi, deya xabar bermoqda Knews.
Uning so‘zlariga ko‘ra, samolyot “qora qutilari”ni o‘rganish bo‘yicha ishlar qariyb yakuniga yetgan.
“Samolyotning qariyb barcha vayron bo‘lgan elementlari muhofaza ostida. Ikkita ‘qora quti’ Moskvadagi markaziy idoramizga yuborilgan. ‘Qora qutilar’dan barcha ma’lumot olindi va ular yaxshi holatda”, — dedi Kashirskiy.
Uning qo‘shimcha qilishicha, halokatga uchragan samolyotda hech qanday texnik nosozlik bo‘lmagan.
“Aytishim mumkin bo‘lgani, samolyotdagi yuk Qirg‘iziston emas, balki Turkiya uchun mo‘ljallangan bo‘lgan. Men yukni qabul qiluvchilarning nomini ayta olmayman, ular abbreviaturalar bilan shifrlangan va yuk egalarini aniqlash DAQ vakolatiga kirmaydi”, — deya qo‘shimcha qildi u.
Ma’lumot uchun, 16-yanvar, dushanba kuni tongda Bishkekning “Manas” aeroportidan bir necha kilometr masofada joylashgan “Dacha” qo‘rg‘oniga Turkiyaning MyCargo Airlines aviakompaniyasiga tegishli “Boing 747” yuk samolyoti qulagan edi. So‘nggi ma’lumotlarga ko‘ra, aviahalokat qurbonlari soni 39 nafarga yetgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)