Obamaning iti Oq uyga mehmonga kelgan qizni tishlab oldi

AQSh prezidenti Barak Obama oilasining iti davlat rahbarining qarorgohiga mehmon bo‘lib kelgan qizni tishlab oldi, deb xabar bermoqda TMZ.

Nashrning ma’lumotlariga ko‘ra, hodisa 9-yanvar, dushanba kuni yuz bergan. Prezident oilasining do‘sti bo‘lgan 18 yoshli qiz Sanni laqabli itga yaqinlashgan va uni o‘pmoqchi bo‘lgan, it esa qizning yuzidan tishlab olgan. E’lon qilingan fotosuratda qizning o‘ng ko‘zi ostida qonayotgan jarohat ko‘rinib turibdi.

Prezident oilasining shifokori qizning jarohatini tekshirib ko‘rgach, uni tikishga qaror qildi.

Ta’kidlanishicha, bunday o‘zini tutish prezidentning iti mansub bo‘lgan portugal suv itlari zotiga xos emas. Davlat rahbari oilasining 4 yoshli Sannidan tashqari, 8 yoshli Bo laqabli iti ham bor.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.