Rossiyaning Vladimir viloyatidagi Aleksandrovskiy tumanida yashovchi oila o‘zining ikki yoshli Rasul ismli o‘g‘lining ismini Putinga o‘zgartirdi. Bu haqda Aleksandrovskiy tumani FHDYo bo‘limi mudirasi Yekaterina Belous “RIA Novosti”ga ma’lum qildi.
Mudiraning so‘zlariga ko‘ra, FHDYo bo‘limiga Jo‘rayevlar oilasi o‘zlarining ikki yoshli Rasul ismli o‘g‘lining ismini o‘zgartirishni so‘rab murojaat qilgan.
“Bola Moskvada tug‘ilgan va Moskvada ro‘yxatga olingan. Biroq ular bizning tumanda yashaydi va bizga bolaning ismini o‘zgartirishni so‘rab murojaat qilishga haqli. Biz Moskvaga so‘rov jo‘natdik, u yerda mutaxassislar hujjatlarga ushbu o‘zgartirishni kiritishdi va bizga yangi tug‘ilganlik haqidagi guvohnomani jo‘natishdi. Kecha bolakay yangi ism bilan tug‘ilganlik haqidagi guvohnomani oldi – Putin Jo‘rayev”, — dedi FHDYo mudirasi. Bolaning to‘liq ismi-sharifi – Putin Jahongirovich Jo‘rayev.
Mahalliy OAVlarning ma’lumotiga ko‘ra, Jo‘rayevlar oilasi asli Tojikistondan, hozirgi paytda Aleksandrovskiy tumanining Legkovo qishlog‘ida yashaydi. Bola ismini o‘zgartirish fikri Rossiya prezidentining tarafdori bo‘lgan bolaning bobosidan chiqqan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)