Ukrainaning Ujgorod shahrida istiqomat qiluvchi Denis Malafeyev yarador urg‘ochi itni isitib, qo‘llab-quvvatlab turgan ko‘ppak haqida hikoya qildi. Jonivorlarni Ujgorod yaqinidagi Seglovka stansiyasidan topishgan, deya xabar bermoqda Meduza.
Malafeyevning do‘stlari unga ikki kundan beri temiryo‘l izida ikki it yotgani haqida ma’lumot bergan. Aytilgan joyga kelganida, yigit ulardan biri poyezdga urilib, jarohat olganini va o‘rnidan tura olmayotganini ko‘rgan.
Urg‘ochi it relsda yotar, uning yonida yana bir it bor edi. U nafaqat dugonasini isitib, uni odamlardan muhofaza qilib turgan, balki yo‘ldan poyezd o‘tayotgan vaqtda hamrohini qo‘llab-quvvatlagan ham.
Malafeyev hikoya qiladi: “Poyezd tovushini eshitib, ko‘ppak urg‘ochi itga yaqinlashdi va uning yoniga yotdi. Har ikkala jonivor boshini tushirib oldi va poyezd ularning ustidan o‘tib ketdi. Og‘aynilar, ko‘ppak bu ishni ikki kun davomida qilgan, tasavvur qilyapsizmi!”.
Malafeyevning aytishicha, har ikkala it jonivorlar uchun mo‘ljallangan boshpanaga olib ketilgan.
“U dugonasi muzlab qolmasligi uchun uni ikki kun davomida isitib turgan va har safar o‘zini xavf ostiga qo‘ygan! Bilmadim, buni nima deb atash mumkin: instinkt, muhabbat, do‘stlikmi yo sadoqat. Lekin bir narsani bilaman: har kimning ham qo‘lidan kelmaydigan ish bu. Biz uchun ibratli voqea bu!”, — deb yozdi Malafeyev Facebook’dagi sahifasida.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)