Украинанинг Ужгород шаҳрида истиқомат қилувчи Денис Малафеев ярадор урғочи итни иситиб, қўллаб-қувватлаб турган кўппак ҳақида ҳикоя қилди. Жониворларни Ужгород яқинидаги Сегловка станциясидан топишган, дея хабар бермоқда Meduza.
Малафеевнинг дўстлари унга икки кундан бери темирйўл изида икки ит ётгани ҳақида маълумот берган. Айтилган жойга келганида, йигит улардан бири поездга урилиб, жароҳат олганини ва ўрнидан тура олмаётганини кўрган.
Урғочи ит рельсда ётар, унинг ёнида яна бир ит бор эди. У нафақат дугонасини иситиб, уни одамлардан муҳофаза қилиб турган, балки йўлдан поезд ўтаётган вақтда ҳамроҳини қўллаб-қувватлаган ҳам.
Малафеев ҳикоя қилади: «Поезд товушини эшитиб, кўппак урғочи итга яқинлашди ва унинг ёнига ётди. Ҳар иккала жонивор бошини тушириб олди ва поезд уларнинг устидан ўтиб кетди. Оғайнилар, кўппак бу ишни икки кун давомида қилган, тасаввур қиляпсизми!».
Малафеевнинг айтишича, ҳар иккала ит жониворлар учун мўлжалланган бошпанага олиб кетилган.
«У дугонаси музлаб қолмаслиги учун уни икки кун давомида иситиб турган ва ҳар сафар ўзини хавф остига қўйган! Билмадим, буни нима деб аташ мумкин: инстинкт, муҳаббат, дўстликми ё садоқат. Лекин бир нарсани биламан: ҳар кимнинг ҳам қўлидан келмайдиган иш бу. Биз учун ибратли воқеа бу!», — деб ёзди Малафеев Facebook’даги саҳифасида.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)