Sardor Rashidov Xavi harakat qiladigan klub darvozasiga gol urdi va “Al-Jaish”ni mag‘lubiyatdan qutqardi

O‘zbekistonlik futbolchi Sardor Rashidov Qatar Yulduzlar Ligasining 13-turida ham gol urib, mavsumdagi muvaffaqiyatli zarbalari sonini 8 taga yetkazib oldi. Qayd etish kerak, O‘zbekiston milliy terma jamoasi a’zosi ketma-ket uchta turda gol urishga muvaffaq bo‘ldi.

Chempionlar Ligasining yarim finaliga qadar yetib borgan “Al-Jaish” o‘z maydonida ispaniyalik futbolchi harakat qiladigan “As-Sadd”ni qabul qildi va 1:1 hisobida durang o‘ynadi. Uchrashuvda hisob 32-daqiqada penaltidan ochilgan bo‘lsa, 43-daqiqada Rashidov mezbonlarni mag‘lubiyatdan qutqarib qolgan golga mualliflik qildi.

13-turdan keyin “Al-Jaish” hisobidagi 29 ochko bilan Qatar Yulduzlar Ligasida uchinchi bo‘lib turibdi. Peshqadam “Lahviya” 33, 2-o‘rindagi “As-Sadd” esa 31 ochko jamg‘arib ulgurgan.

Sardor Rashidov 13 ta turi yakuniga yetgan chempionatning 12 ta o‘yinida maydonga tushib, 8 ta gol urishga erishgan. Bu borada futbolchi Yulduzlar Ligasining to‘purarlari orasida oltinchi bo‘lib turibdi. “Lahviya”ning marokashlik hujumchisi Al-Arabi 13 ta turda 17 ta gol urib, bu borada yetakchilikni qo‘lga olgan. To‘purarlar safida borayotgan dastlabki olti futbolchining barchasi legionerlar hisoblanadi.

Qatar Yulduzlar Ligasi 13-tur o‘yini 22-dekabr, payshanba

“Al-Jaish” — “As-Sadd” 1:1