Сардор Рашидов Хави ҳаракат қиладиган клуб дарвозасига гол урди ва «Ал-Жаиш»ни мағлубиятдан қутқарди

Ўзбекистонлик футболчи Сардор Рашидов Қатар Юлдузлар Лигасининг 13-турида ҳам гол уриб, мавсумдаги муваффақиятли зарбалари сонини 8 тага етказиб олди. Қайд этиш керак, Ўзбекистон миллий терма жамоаси аъзоси кетма-кет учта турда гол уришга муваффақ бўлди.

Чемпионлар Лигасининг ярим финалига қадар етиб борган «Ал-Жаиш» ўз майдонида испаниялик футболчи ҳаракат қиладиган «Ас-Садд»ни қабул қилди ва 1:1 ҳисобида дуранг ўйнади. Учрашувда ҳисоб 32-дақиқада пенальтидан очилган бўлса, 43-дақиқада Рашидов мезбонларни мағлубиятдан қутқариб қолган голга муаллифлик қилди.

13-турдан кейин «Ал-Жаиш» ҳисобидаги 29 очко билан Қатар Юлдузлар Лигасида учинчи бўлиб турибди. Пешқадам «Лаҳвия» 33, 2-ўриндаги «Ас-Садд» эса 31 очко жамғариб улгурган.

Сардор Рашидов 13 та тури якунига етган чемпионатнинг 12 та ўйинида майдонга тушиб, 8 та гол уришга эришган. Бу борада футболчи Юлдузлар Лигасининг тўпурарлари орасида олтинчи бўлиб турибди. «Лаҳвия»нинг марокашлик ҳужумчиси Ал-Араби 13 та турда 17 та гол уриб, бу борада етакчиликни қўлга олган. Тўпурарлар сафида бораётган дастлабки олти футболчининг барчаси легионерлар ҳисобланади.

Қатар Юлдузлар Лигаси 13-тур ўйини 22 декабрь, пайшанба

«Ал-Жаиш» — «Ас-Садд» 1:1