Ўзбекистонлик боксчи Ҳасанбой Дўстматов йилнинг энг яхши боксчисига аталган Халқаро ҳаваскор боксчилар ассоциацияси (AIBA) совринини қабул қилиб олиш учун 18 декабрь куни Швейцарияга жўнаб кетди. Бу ҳақда «Оламспорт» хабар бермоқда.
Аввалроқ AIBA томонидан йилнинг энг яхши боксчисини аниқлаш мақсадида ўтказилган халқаро сўровномада Ҳасанбой Дўстматов энг яқин таъқибчиси — қозоғистонлик Олимпиада чемпиони Данияр Елиусиновни катта фарқ билан ортда қолдиргани ҳолда, биринчи бўлган эди.
Хабар беришларича, тақдирлаш маросими 20 декабрь куни Швейцариянинг Лозанна шаҳрида бўлиб ўтади. Тадбирда Дўстматовга Ўзбекистон бокс федерацияси вице-президенти, Осиё бокс конфедерацияси вице-президентига айланган Шерзод Тошматов ҳамроҳлик қилади.
23 ёшли Ҳасанбой Дўстматов 2016 йили Бразилиянинг Рио-де-Жанейро шаҳрида бўлиб ўтган ёзги Олимпиада ўйинлари бокс мусобақаларида 49 килограмм вазн тоифасида чемпионликни қўлга киритди.
Рио—2016 даги ёрқин иштироки сабаб, Ҳасанбой Дўстматов 1936 йилдан бери ҳар Олимпиадада техникаси энг кучли боксчига топшириладиган Вэл Баркер кубогини қўлга киритган илк ўзбекистонлик бўлди.
Бундан ташқари, декабрь ойида Ҳасанбой Дўстматов спортда юқори натижаларни қўлга киритган спортчиларга топшириладиган халқаро «Олтин мангуст» мукофоти билан тақдирлангани маълум қилинган эди.
Олимпиададаги иштирокидан сўнг Ҳасанбой Дўстматов Ўзбекистон Биринчи Президенти Ислом Каримов томонидан «Ўзбекистон ифтихори» фахрий унвони, 200 минг доллар миқдоридаги пул мукофоти ҳамда Malibu автомобили билан тақдирланган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)