APL. “Yunayted” ketma-ket uchinchi, “Chelsi” esa 11-g‘alabasini qo‘lga kiritdi

Futbol bo‘yicha Angliya Premyer-Ligasining 17-turi doirasida 6 uchrashuv bo‘lib o‘tdi.

Ligada karvonboshi bo‘lib turgan Londonning “Chelsi” klubi mazkur turni “Kristal Pelas” maydonida o‘tkazib, Diyego Kostaning yagona goli evaziga zafar quchdi. Bu bilan hujumchi mavsumdagi gollari sonini 13 taga yetkazib, to‘purarlar poygasida yana yakka peshqadamga aylanib oldi. Aleksis Sanches hisobida 12 ta, Zlatan Ibrahimovichda esa 11 ta gol bor.

“Chelsi” ketma-ket 11 ta bellashuvda zafar quchib, 2009-yilgi rekordini takrorladi. Bu bilan londonliklar ta’qibchilaridan 9 ochkolik farq bilan oshib ketdi. Ma’lumot uchun, “Chelsi” Rojdestvoga karvonboshi sifatida yetib kelgan mavsumlarini keyinchalik mamlakat chempioni sifatida yakunlagan.

Mazkur turda Joze Mourinyo boshchilik qilayotgan “Manchester Yunayted” “Vest Bromvich” maydonida zafar quchdi. 35 yoshli Zlatan Ibrahimovichning dubl qayd etishini portugaliyalik mutaxassis shunchaki fantastika deb atadi.

G‘alaba natijasida “Yunayted” ochkolari sonini “Tottenhem”niki bilan tenglashtirib oldi. 17-turning qolgan 4 ta o‘yini bugun bo‘lib o‘tadi va bu bilan yetakchi klublar ochkolar jamg‘arib olishi mumkin.

Mamlakatning amaldagi chempioni hisoblangan “Lester”ni turning eng irodali jamoasi deb atash mumkin. Jeymi Vardi 28-daqiqada maydondan chetlatilgach, Klaudio Ranyeri shogirdlari 2 ta gol o‘tkazib yuborgandi. Keyinroq esa 1 kishi kam bo‘lishiga qaramay, muvozanatni tiklashga muvaffaq bo‘ldi.

Angliya Premyer-Ligasi 17-tur bellashuvlari 17-dekabr, shanba

“Kristal Pelas” — “Chelsi” 0:1

“Vest Hem” — “Xall Siti” 1:0

“Midlsbro” — “Suonsi” 3:0

“Sanderlend” — “Uotford” 1:0

“Stok Siti” — “Lester” 2:2

“Vest Bromvich” — “Manchester Yunayted” 0:2

18-dekabr, yakshanba“Bornmut” — “Sautgempton”“Manchester Siti” — “Arsenal”“Tottenhem” — “Byornli”“Everton” — “Liverpul”