AQSh Oliy sudi 14 yoshli qizni zo‘rlagani va o‘ldirgani uchun sudlanib, o‘lim jazosiga hukm qilingan Romell Brumning apellyatsiyasini rad etdi, deb yozadi “Interfaks”. Hukm 2009-yilda Ogayoda ijro etilishi kerak edi, ammo unga o‘lim inyeksiyasini qilib bo‘lmadi va mahbus tirik qoldi.
Ikki soat davomida hukmni ijro etishga mas‘ul bo‘lgan shaxslar inyeksiya uchun mos tushadigan vena qon tomirini topishga urindi, ammo buning uddasidan chiqa olmadi. Qamoqxona shifokorini chaqirishdi, ammo u qatlda hech qachon ishtirok etib ko‘rmagani uchun yordam bera olmadi. Mahbusning o‘zi keyinroq uning badaniga kamida 18 marta igna sanchishganini, uning og‘riqdan yig‘layotganiga e’tibor ham berishmaganini ta’kidladi.
Oxir-oqibat, Ogayo gubernatori urinishlarni to‘xtatish haqida qaror chiqardi. Brum sud qarori chiqquniga qadar hibs ostida qoldi.
Uning advokati hukmni ijro etish uchun ikkinchi urinish odamni bitta jinoyat uchun ikki marta jazolab bo‘lmasligi to‘g‘risidagi qonunga xilof ekanligini da’vo qildi, ammo sud boshqacha qaror chiqardi. Prokuror Brumning sud ishidagi yagona shafqatsizlik qotilning cheksiz apellyatsiyalari marhum qizchaning ota-onasiga yetkazayotgan azoblardan iborat ekanligini ta’kidladi.
Biroq hozircha qatl qachon amalga oshirilishi noma’lum, chunki o‘lim hukmlarini ijro etishning o‘z grafigi bor, inyeksiya uchun medikamentlarni yetkazib berish esa beqaror.
Izoh (0)