Dunyodagi eng yirik yo‘lovchi samolyoti portlash xavfi tufayli Nyu-York aeroportiga shoshilinch qo‘ndi
Germaniyaning Lufthansa aviakompaniyasi samolyoti portlash xavfi tufayli Nyu-York aeroportida shoshilinch qo‘nishni amalga oshirdi. Bu haqda ABC News xabar bermoqda.
Layner havo qo‘nalg‘asi chetidagi turargohga yetkazildi, barcha yo‘lovchilar va ekipaj a’zolari evakuatsiya qilindi. Maxsus xizmatlar xodimlari portlovchi moddalar bor-yo‘qligini aniqlash uchun bortni sinchiklab ko‘zdan kechirmoqda.
Havo kemasi komandiri yerdagi xizmatlar bilan kelishgan holda, aviakompaniya ofislaridan biriga noma’lum kimsa bortga portlovchi qurilma joylashtirilgani haqida qo‘ng‘iroq qilganidan so‘ng parvozni to‘xtatish to‘g‘risida qaror qabul qildi.
Ma’lumot uchun, dunyodagi eng yirik yo‘lovchi samolyoti bo‘lgan Airbus A380 Xyustondan Frankfurt-Maynga yo‘l olgan, uning bortida 530 kishi bor edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
