АҚШ Олий суди 14 ёшли қизни зўрлагани ва ўлдиргани учун судланиб, ўлим жазосига ҳукм қилинган Ромелл Брумнинг апелляциясини рад этди, деб ёзади «Интерфакс». Ҳукм 2009 йилда Огайода ижро этилиши керак эди, аммо унга ўлим инъекциясини қилиб бўлмади ва маҳбус тирик қолди.
Икки соат давомида ҳукмни ижро этишга масъул бўлган шахслар инъекция учун мос тушадиган вена қон томирини топишга уринди, аммо бунинг уддасидан чиқа олмади. Қамоқхона шифокорини чақиришди, аммо у қатлда ҳеч қачон иштирок этиб кўрмагани учун ёрдам бера олмади. Маҳбуснинг ўзи кейинроқ унинг баданига камида 18 марта игна санчишганини, унинг оғриқдан йиғлаётганига эътибор ҳам беришмаганини таъкидлади.
Охир-оқибат, Огайо губернатори уринишларни тўхтатиш ҳақида қарор чиқарди. Брум суд қарори чиққунига қадар ҳибс остида қолди.
Унинг адвокати ҳукмни ижро этиш учун иккинчи уриниш одамни битта жиноят учун икки марта жазолаб бўлмаслиги тўғрисидаги қонунга хилоф эканлигини даъво қилди, аммо суд бошқача қарор чиқарди. Прокурор Брумнинг суд ишидаги ягона шафқатсизлик қотилнинг чексиз апелляциялари марҳум қизчанинг ота-онасига етказаётган азоблардан иборат эканлигини таъкидлади.
Бироқ ҳозирча қатл қачон амалга оширилиши номаълум, чунки ўлим ҳукмларини ижро этишнинг ўз графиги бор, инъекция учун медикаментларни етказиб бериш эса беқарор.
Изоҳ (0)