Qirg‘iziston hududida joylashgan barcha saylov uchastkalari ma’lumotni avtomatik tarzda hisoblovchi ovoz berish elektron qutilari bilan jihozlandi. Bu haqda 9-dekabr, juma kuni Qirg‘izistonda saylovlar va referendumlar o‘tkazish bo‘yicha Markaziy saylov komissiyasi matbuot xizmati ma’lum qildi, deb yozadi “TASS”.
“Hozirgi paytga kelib mamlakatdagi 2 330 saylov uchastkasi to‘liq texnik jihozlangan. Mahalliy kengashlarga saylovlar va referendumlar uchun 5 588 ta avtomatik hisoblovchi qutilar topshirilgan”, — deyiladi xabarda.
Matbuot xizmatining ma’lum qilishicha, yaqin vaqt ichida joylarga mazkur qurilmalar uchun zaxira qismlari yuboriladi. Ular texnik muammolar yuzaga keladigan holatlar uchun mo‘ljallangan.
Boshqarma xabarida ta’kidlanishicha, elektron saylov qutilari yuqori texnologik qurilmalar bo‘lib, ovoz berishni maksimal darajada shaffof o‘tkazish imkonini beradi.
Respublikada Qirg‘iziston konstitutsiyasiga o‘zgartirishlar kiritish, shuningdek, bir qator mahalliy hokimiyat organlari deputatlari saylovi 11-dekabr kuni bo‘lib o‘tadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)