6-dekabr kuni O‘zbekiston Respublikasi Oliy Majlisi Qonunchilik palatasining navbatdagi majlisi bo‘lib o‘tdi, deya xabar bermoqda O‘zA.
Majlisda deputatlar jamiyat hayotining turli sohalarida amalga oshirilayotgan islohotlarni yanada chuqurlashtirishga, fuqarolarning, tadbirkorlik subyektlarining huquqlari, erkinliklari va qonuniy manfaatlarini himoya qilishga qaratilgan bir qator qonun loyihalarini ko‘rib chiqdi.
Deputatlar “Tadbirkorlik faoliyatining jadal rivojlanishini ta’minlashga, xususiy mulkni har tomonlama himoya qilishga va ishbilarmonlik muhitini sifat jihatidan yaxshilashga doir qo‘shimcha chora-tadbirlar qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasini muhokama qildi.
5-oktabr kuni qabul qilingan “Tadbirkorlik faoliyatining jadal rivojlanishini ta’minlashga, xususiy mulkni har tomonlama himoya qilishga va ishbilarmonlik muhitini sifat jihatidan yaxshilashga doir qo‘shimcha chora-tadbirlar to‘g‘risida”gi Prezident farmonini amalga oshirishga qaratilgan qonun loyihasi tadbirkorlik subyektlarining faoliyatiga asossiz aralashuvlardan ishonchli huquqiy kafolatlarni ta’minlashni, ularning mas’uliyatini yanada erkinlashtirishni va jinoyat ishlari bo‘yicha taftishlar o‘tkazishni protsessual jihatdan aniq tartibga solishni nazarda tutadi.
Qonunda moliyaviy-xo‘jalik faoliyatini amalga oshirish chog‘ida birinchi marta huquqbuzarlik sodir etgan tadbirkorlik subyektlarini va ularning xodimlarini, shuningdek, davlat ro‘yxatidan o‘tkazmagan holda tadbirkorlik faoliyatini amalga oshirgan shaxslarni, agar yetkazilgan zararning o‘rni ular tomonidan qoplangan va huquqbuzarlik oqibatlari ixtiyoriy ravishda bartaraf etilgan taqdirda, javobgarlikning barcha turlaridan ozod etish, shuningdek, tadbirkorlik subyektlariga nisbatan tadbirkorlik faoliyati bilan shug‘ullanish huquqidan mahrum etish tarzidagi jinoiy jazoni qo‘llashga taqiq belgilash nazarda tutilmoqda.
Deputatlarning fikricha, ushbu normalar tadbirkorlik subyektlarini ikki tomonlama jazolash imkoniyatini istisno etibgina qolmay, balki ilk bor huquqbuzarlik sodir etgan va o‘z aybini anglab yetgan fuqarolarga hech qanday salbiy oqibatlarsiz o‘z tadbirkorlik faoliyatini davom ettirish imkoniyatini beradi, bu esa ularning ishbilarmonlik borasidagi faolligini rag‘batlantirishga xizmat qiladi.
Shu munosabat bilan Jinoyat kodeksiga, Ma’muriy javobgarlik to‘g‘risidagi kodeksga, Soliq kodeksiga hamda bir qator boshqa qonunlarga tegishli o‘zgartish va qo‘shimchalar kiritilmoqda.
Bundan tashqari, qonun loyihasida bir qator qonun hujjatlariga muqobil tekshiruvlarning barcha turlarini, shu jumladan, jinoyat ishlari bo‘yicha muqobil tekshirishlarning barcha turlarini bekor qilishga taalluqli tuzatishlar kiritish nazarda tutiladi. Bu esa tadbirkorlik subyektlarini rejadan tashqari tekshirish imkoniyatini istisno etishiga olib keladi.
Parlament quyi palatasi deputatlari o‘z ishini “Soliq va byudjet siyosatining 2017-yilga mo‘ljallangan asosiy yo‘nalishlari qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasini muhokama qilish bilan davom ettirdi.
Mazkur qonun loyihasida “Fuqarolarning davlat pensiya ta’minoti to‘g‘risida”gi, “Lizing to‘g‘risida”gi, “Tadbirkorlik faoliyati erkinligining kafolatlari to‘g‘risida”gi, O‘zbekiston Respublikasi qonunlariga, shuningdek, O‘zbekiston Soliq kodeksiga tuzatishlar kiritish nazarda tutilmoqda.
Deputatlar mazkur qonunlarni, shuningdek, “O‘zbekiston Respublikasi prokuratura organlari xodimlari kunini belgilash to‘g‘risida”gi qonunni qabul qilish va Oliy Majlis Senatiga ko‘rib chiqish uchun yuborish to‘g‘risida qarorlar qabul qildi.
Muloqot chog‘ida deputatlar “Intellektual mulk to‘g‘risidagi qonun hujjatlari yanada takomillashtirilishi munosabati bilan O‘zbekiston Respublikasining ayrim qonunlariga qo‘shimcha va o‘zgartishlar kiritish haqida”gi qonun loyihasini ham muhokama qildi.
Ushbu huquqiy hujjatning qabul qilinishi intellektual mulk egalarining huquqlarini ularning mahsulot belgilaridan insofsiz raqobatchilar tomonidan foydalanilishidan himoya qilish darajasini sifat jihatdan oshirish, tadbirkorlik subyektlariga ro‘yxatga olingan tovar belgilari to‘g‘risidagi axborotlardan jadal foydalanish, sud qarorlarini qabul qilish chog‘ida tovar belgisini insofsizlik bilan ro‘yxatdan o‘tkazilishidan tadbirkorlik subyektlarini himoya qilishda yakuniy qarorning yanada aniq va bir xilda ifodalanishini ta’minlash imkonini beradi.
Bundan tashqari, tovar bozorlarida insofsiz raqobat holatlariga qarshi yanada samaraliroq kurashish va bunday holatlarning oqibatlarini bartaraf etish juda muhimdir. Normalar intellektual mulkni himoya qilish huquqining xalqaro amaliyotiga muvofiqlashtirilgan.
Shuningdek, majlisda deputatlar “Faoliyatning ayrim turlarini litsenziyalash to‘g‘risida”gi va “Tadbirkorlik faoliyati sohasida ruxsat berish tartib-taomillari to‘g‘risida”gi O‘zbekiston Respublikasi qonunlariga o‘zgartish va qo‘shimchalar kiritishni nazarda tutuvchi qonun loyihasiga hamda boshqa qonun hujjatlariga e’tiborni qaratdi.
Mazkur tuzatishlar ruxsat berish tusidagi litsenziyalar va hujjatlarni qayta rasmiylashtirish tartibini takomillashtirishga va shu bilan tadbirkorlik faoliyatini yuritish uchun qulay shart-sharoitlar yaratishga qaratilgan.
Mazkur qonun loyihasining qabul qilinishi ruxsat berish tusidagi litsenziyalar va hujjatlarni qayta rasmiylashtirish tartibini soddalashtirishga hamda litsenziyalash va ruxsat berish tartib-taomillaridan o‘tish sohasini huquqiy tartibga solish borasidagi noaniqliklarni bartaraf etishga xizmat qiladi.
“Majlis qiziqarli bahs tarzida o‘tdi, bu esa ushbu huquqiy hujjatlarni har tomonlama muhokama etish imkonini berdi. Parlament vakillari Qonunchilik palatasi vakolatlariga taalluqli boshqa masalalarni ham muhokama qildi”, — deyiladi agentlik axborotida.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)