AQShning yangi saylangan prezidenti Donald Tramp o‘z inauguratsiyasidan so‘ng qandaydir xavf to‘g‘risida ogohlantirishlardan iborat matnli xabarlarni amerikaliklarning smartfonlariga yuborish imkoniyatiga ega bo‘ladi. Bu haqda Washington Examiner gazetasida chop etilgan maqolada aytiladi, deb yozadi “TASS”.
Bunday imkoniyatni respublikachiga mamlakatni ogohlantirish va xabardor qilish tizimini tartibga soluvchi yangi qonun taqdim etadi. Unga ko‘ra, Tramp 300 milliondan ortiq amerikaliklarga AMBER Alert xalqaro tizimi doirasida bolalarning yo‘qolib qolishi haqida, shuningdek, fuqarolarning hayoti va xavfsizligiga bevosita xavf solayotgan omillar haqida xabarlar yubora oladi. Ushbu xabarlar favqulodda vaziyatlar haqida ogohlantirish federal tizimi orqali bir lahzada muayyan hudud yoki mamlakatdagi barcha telefonlarga jo‘natiladi.
Favqulodda vaziyatlar haqidagi oddiy xabarlar kelishini bloklab qo‘yish imkoniyatiga qaramay, amerikaliklar o‘zlarining yangi prezidentidan bildirishnomalar qabul qilishdan bosh torta olmaydi. Gazetada qayd etilishicha, Tramp qonunga ko‘ra, turli xavflar bilan bog‘liq xabarlarnigina yubora oladi, u ushbu tizimdan siyosiy murojaatlar uchun foydalana olmaydi.
Izoh (0)