BMT bosh kotibi Pan Gi Mun 26-noyabr, shanba kuni Turkmaniston prezidenti Gurbanguli Berdimuhammedov bilan Markaziy Osiyoga taalluqli mintaqaviy masalalarni muhokama etdi. Shuningdek, Ashxobodda xalqaro tashkilot vakolatxonasining yangi binosini ochdi, deb xabar beradi “TASS”.
Bundan avval bosh kotib Turkmaniston poytaxtida bo‘lib o‘tayotgan barqaror transport tizimi bo‘yicha xalqaro anjumanda chiqish qildi. Pan Gi Mun forum ishtirokchisi bo‘lgan davlatlarni transport xavfsiz, qulay va ekologik toza bo‘lishiga qaratilgan “dadil va innovatsiyali qadamlar” tashlashga chaqirdi.
Uning aytishicha, har yili dunyo bo‘yicha yo‘l-transport hodisalarida 1,2 million kishi halok bo‘ladi, ularning 90 foizi rivojlanayotgan mamlakatlarda istiqomat qiladi. Bundan tashkari, atrof-muhit ifloslanishi keltirib chiqaradigan kasalliklar tufayli yiliga 3 million kishi hayotdan ko‘z yumadi.
BMT rasmiy saytidagi ma’lumotga ko‘ra, 27-noyabr, yakshanba kuni yakunlanadigan anjumanda 1,5 minggga yaqin kishi ishtirok etmoqda. Ular orasida davlat va hukumat rahbarlari, xususiy sektor hamda fuqarolik jamiyati vakillari bor.
Izoh (0)