БМТ бош котиби Пан Ги Мун 26 ноябрь, шанба куни Туркманистон президенти Гурбангули Бердимуҳаммедов билан Марказий Осиёга тааллуқли минтақавий масалаларни муҳокама этди. Шунингдек, Ашхободда халқаро ташкилот ваколатхонасининг янги биносини очди, деб хабар беради «ТАСС».
Бундан аввал бош котиб Туркманистон пойтахтида бўлиб ўтаётган барқарор транспорт тизими бўйича халқаро анжуманда чиқиш қилди. Пан Ги Мун форум иштирокчиси бўлган давлатларни транспорт хавфсиз, қулай ва экологик тоза бўлишига қаратилган «дадил ва инновацияли қадамлар» ташлашга чақирди.
Унинг айтишича, ҳар йили дунё бўйича йўл-транспорт ҳодисаларида 1,2 миллион киши ҳалок бўлади, уларнинг 90 фоизи ривожланаётган мамлакатларда истиқомат қилади. Бундан ташкари, атроф-муҳит ифлосланиши келтириб чиқарадиган касалликлар туфайли йилига 3 миллион киши ҳаётдан кўз юмади.
БМТ расмий сайтидаги маълумотга кўра, 27 ноябрь, якшанба куни якунланадиган анжуманда 1,5 минггга яқин киши иштирок этмоқда. Улар орасида давлат ва ҳукумат раҳбарлари, хусусий сектор ҳамда фуқаролик жамияти вакиллари бор.
Изоҳ (0)