Avstraliya politsiyasi uchuvchi va dispetcherlarni laqillatgan yigitchani qo‘lga oldi

Autizm va depressiyadan azob chekuvchi yosh avstraliyalik deyarli ikki oy davomida Melburndagi ikkita aeroport dispetcherlari va uchuvchilarini adashtirib keldi, deb yozadi The Sydney Morning Herald.

Mahalliy fuqaro Pol Sent yopiq chastotada radioefirga chiqishni o‘rganib, o‘zini Avalon va Tullamarin aeroportlari uchuvchi va dispetcherlari qilib ko‘rsatdi. Xususan, 19 yoshli Sent Virgin Australia aviakompaniyasi laynerining qo‘nishiga yo‘l qo‘ymadi. 5-sentabrdan 3-noyabrgacha radiobezori jami 16 marta efirga chiqqan.

Yigit Avstraliya federal politsiyasi tomonidan 21-noyabr kuni hibsga olindi va ertasi kuni sud qarshisida namoyon bo‘ldi. Yigitcha havo kemalari uchun xavf tug‘dirganlikda va laynerlar boshqaruviga aralashganlikda ayblanmoqda. Sent 20 yilgacha muddatga qamalishi mumkin.