Noma’lum xakerlar AQSh harbiy-dengiz kuchlarining (HDK) 134 mingdan ortiq xizmatni o‘tayotgan va iste’foga chiqqan harbiy xizmatchisiga oid ma’lumotlar saqlanayotgan noutbukni buzib kirdi. Bu haqda HDK boshlig‘ining shaxsiy tarkib bo‘yicha o‘rinbosari Robert Berkning matbuot xizmati ma’lum qildi, deya xabar beradi “TASS”. 

Matbuot xizmatiga ko‘ra, 27-oktabrda Hewlett Packard kompaniyasi AQSh HDKni mamlakat Qurolli kuchlarida xizmat qiladigan xodimi noutbukiga buzib kirilgani haqida xabardor qilgan. 22-noyabrda, dastlabki tahlillardan so‘ng, noma’lum shaxslar maxfiy ma’lumotlar, jumladan, HDKning 134 ming 386 nafar xizmatdagi va iste’fodagi harbiy xizmatchisi ismi-sharifi hamda ijtimoiy sug‘urta raqami bo‘yicha ma’lumotlarga ega bo‘lganini ko‘rsatdi. 

“AQSh HDK mazkur hodisaga o‘ta jiddiy qaraydi. Bu bizning harbiy xizmatchilarimiz ishonchi bilan bog‘liq masala. Tekshiruvning dastlabki bosqichida turibmiz, jabrlanganlarga zarur yordam ko‘rsatiladi”, — deya ta’kidladi vitse-admiral Robert Berk. 

Matbuot xizmati tekshiruvlarning dastlabki bosqichi buzib kirish natijasida qo‘lga kiritilgan ma’lumotlardan noqonuniy foydalanilgani haqida xulosa chiqarishga asos bermasligini ma’lum qildi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.