O‘zbekiston Respublikasi Prezidentligiga “Milliy tiklanish” demokratik partiyasidan nomzod Sarvar Otamuratovning Toshkent shahar saylovchilari bilan “Turkiston” saroyida o‘tkazilgan uchrashuvida shaharning barcha tumanlaridan saylovchilar ishtirok etdi. Bu haqda “Daryo”ga partiya Toshkent shahar kengashi axborot xizmati xabar berdi.
Uchrashuvda Prezidentlikka nomzodning ishonchli vakili Feruza Muhitdinova yig‘ilganlarga Sarvar Otamuratov tarjimai holi va faoliyati haqida atroflicha ma’lumot berdi.
Nomzod Toshkent shahar saylovchilarini saylovoldi dasturida belgilangan ustuvor vazifalar bilan batafsil tanishtirar ekan, “Barkamol avlod — millat tayanchi” tamoyili ostida yoshlar ongiga milliy tiklanish g‘oyasini singdirish, ularni milliy ma’naviyat va qadriyatlar ruhida tarbiyalashni yanada kuchaytirish zarurligini bildirdi. Bu borada kino, teatr va estrada san’atida xalqimizning boy va betakror tarixi, madaniyati, an’analari va ilg‘or urf-odatlarini ta’sirchan badiiy obrazlar orqali ifoda etadigan asarlarni yaratish taklifini berdi.
Uchrashuvda yoshlarning ma’naviy kamoloti bilan bir qatorda, ularning jismonan yetukligiga ham alohida e’tibor qaratish zarurligi ta’kidlandi. Shundan kelib chiqqan holda, nomzod “Farzandlari sog‘lom va barkamol yurt qudratli bo‘lur” shiori ostida mamlakatda keng quloch yoygan va umummilliy vazifaga aylangan bolalar sportini har tomonlama rivojlantirish, sportning barcha turlari, ayniqsa, Olimpiada o‘yinlari dasturidan o‘rin olgan hamda milliy turlarini har tomonlama qo‘llab-quvvatlash, o‘zbek kurashini Olimpiya o‘yinlari qatoriga kiritish darkor, deb hisoblaydi.
Sarvar Otamuratov dasturning boshqa yo‘nalishlariga ham batafsil to‘xtaldi. Unda belgilangan vazifalar saylovchilarda katta qiziqish uyg‘otdi.
Uchrashuvda ta’kidlanganidek, dasturda qayd etilgan ustuvor yo‘nalishlarni amalda ro‘yobga chiqarish mamlakat milliy manfaatlarini har tomonlama himoya qilish, O‘zbekistonda hukm surayotgan tinchlik va osoyishtalikni yanada mustahkamlash, iqtisodiyotning barqaror o‘sish sur’atlarini ta’minlash, xalq farovonligi va mamlakat gullab-yashnashiga xizmat qiladi.
Nomzod dasturini qo‘llab-quvvatlab xalqaro Amir Temur xayriya jamoat fondi raisi N.Habibullayev, Toshkent axborot texnologiyalari universiteti qoshidagi akademik litsey direktori N.Umarova, Toshkent Arxitektura- qurilish instituti o‘qituvchisi O‘.Shakarov, O‘zbekiston davlat jahon tillari universiteti talabasi M.Ashurova va boshqalar so‘zga chiqdi.
Izoh (0)