Axborot texnologiyalari va kommunikatsiyalarini rivojlantirish vazirining buyrug‘i (pdf) bilan Pochta aloqasi xizmatlarini ko‘rsatish qoidalariga o‘zgartirish va qo‘shimchalar kiritildi, deya xabar bermoqda Norma.
Hujjatga muvofiq, xalqaro pul o‘tkazmalarining yangi klassifikatsiyasi tasdiqlandi. Endi ular yuborish uslubiga ko‘ra, oddiy (pochta aloqasi orqali yuboriladigan), tezlashtirilgan (telekommunikatsiyalar tarmog‘i orqali — elektron pul o‘tkazmalari) va gibrid (pochta aloqasi va telekommunikatsiyalar tarmog‘i orqali) pul o‘tkazmalariga bo‘linadi.
Xalqaro pul o‘tkazmalari bilan ayirboshlash bo‘yicha xizmatni taqdim etish uchun pochta aloqasining tayinlangan operatori boshqa mamlakatlarning pochta aloqasi operatorlari bilan ikki tomonlama va ko‘p tomonlama kelishuvlar tuzadi. Xalqaro pul o‘tkazmalari bilan ayirboshlash Umumjahon pochta ittifoqi aktlariga muvofiq amalga oshadi.
Shuningdek, kiritilgan qo‘shimchalarga ko‘ra, tezkor pochtaning xalqaro jo‘natmalarini jo‘natish va yetkazib berish (topshirish) Umumjahon pochta ittifoqining hujjatlariga muvofiq EMS tezkor pochta tizimi bo‘yicha, EMS ko‘p tomonlama namunali kelishuvi yoki ikki tomonlama kelishuvlar asosida amalga oshiriladi.
Qiymati e’lon qilingan posilkalar va xalqaro xatlar, mayda paketlar, mo‘rt va katta posilkalar, “Express” (Shaxsan topshirilsin) belgisi bo‘lgan yozma xat-xabarlar jo‘natmalari va posilkalar, “Frans de taxes et de droits” (Tariflar va yig‘imlar undirmasdan) belgili yozma xat-xabarlar jo‘natmalari va posilkalar, shuningdek, “A remettre en main proper” (O‘z qo‘liga topshirilsin) belgili qiymati e’lon qilingan buyurtma jo‘natmalari, xatlar va posilkalar faqat ularni qabul qilish ruxsat etilgan mamlakatlarga jo‘natish uchun qabul qilinadi.
Izoh (0)