Ўзбекистон Республикаси Президентлигига «Миллий тикланиш» демократик партиясидан номзод Сарвар Отамуратовнинг Тошкент шаҳар сайловчилари билан «Туркистон» саройида ўтказилган учрашувида шаҳарнинг барча туманларидан сайловчилар иштирок этди. Бу ҳақда «Дарё»га партия Тошкент шаҳар кенгаши ахборот хизмати хабар берди.
Учрашувда Президентликка номзоднинг ишончли вакили Феруза Муҳитдинова йиғилганларга Сарвар Отамуратов таржимаи ҳоли ва фаолияти ҳақида атрофлича маълумот берди.
Номзод Тошкент шаҳар сайловчиларини сайловолди дастурида белгиланган устувор вазифалар билан батафсил таништирар экан, «Баркамол авлод — миллат таянчи» тамойили остида ёшлар онгига миллий тикланиш ғоясини сингдириш, уларни миллий маънавият ва қадриятлар руҳида тарбиялашни янада кучайтириш зарурлигини билдирди. Бу борада кино, театр ва эстрада санъатида халқимизнинг бой ва бетакрор тарихи, маданияти, анъаналари ва илғор урф-одатларини таъсирчан бадиий образлар орқали ифода этадиган асарларни яратиш таклифини берди.
Учрашувда ёшларнинг маънавий камолоти билан бир қаторда, уларнинг жисмонан етуклигига ҳам алоҳида эътибор қаратиш зарурлиги таъкидланди. Шундан келиб чиққан ҳолда, номзод «Фарзандлари соғлом ва баркамол юрт қудратли бўлур» шиори остида мамлакатда кенг қулоч ёйган ва умуммиллий вазифага айланган болалар спортини ҳар томонлама ривожлантириш, спортнинг барча турлари, айниқса, Олимпиада ўйинлари дастуридан ўрин олган ҳамда миллий турларини ҳар томонлама қўллаб-қувватлаш, ўзбек курашини Олимпия ўйинлари қаторига киритиш даркор, деб ҳисоблайди.
Сарвар Отамуратов дастурнинг бошқа йўналишларига ҳам батафсил тўхталди. Унда белгиланган вазифалар сайловчиларда катта қизиқиш уйғотди.
Учрашувда таъкидланганидек, дастурда қайд этилган устувор йўналишларни амалда рўёбга чиқариш мамлакат миллий манфаатларини ҳар томонлама ҳимоя қилиш, Ўзбекистонда ҳукм сураётган тинчлик ва осойишталикни янада мустаҳкамлаш, иқтисодиётнинг барқарор ўсиш суръатларини таъминлаш, халқ фаровонлиги ва мамлакат гуллаб-яшнашига хизмат қилади.
Номзод дастурини қўллаб-қувватлаб халқаро Амир Темур хайрия жамоат фонди раиси Н.Ҳабибуллаев, Тошкент ахборот технологиялари университети қошидаги академик лицей директори Н.Умарова, Тошкент Архитектура- қурилиш институти ўқитувчиси Ў.Шакаров, Ўзбекистон давлат жаҳон тиллари университети талабаси М.Ашурова ва бошқалар сўзга чиқди.
Изоҳ (0)