O‘zbekiston Respublikasi Prezidenti saylovini yoritish bo‘yicha Respublika matbuot markazida “Fuqarolar saylov huquqlari ishonchli himoyasini ta’minlashning qonunchiligi va amaliyoti: O‘zbekiston hamda Germaniya tajribasi” mavzuida xalqaro davra suhbati bo‘lib o‘tdi. Bu haqda “Daryo”ga matbuot markazi mutasaddilari ma’lum qildi.
Oliy Majlisning Inson huquqlari bo‘yicha vakili (ombudsman) va Markaziy saylov komissiyasi tomonidan Konrad Adenauer nomidagi jamg‘armaning mamlakatdagi vakolatxonasi bilan hamkorlikda tashkil qilingan davra suhbatida Bosh prokuratura, Oliy sud, Adliya, Ichki ishlar vazirliklari, jamoat tashkilotlari vakillari, huquqshunos-olimlar, germaniyalik siyosatshunoslar, “Mintaqaviy muloqot” xalqaro nodavlat tashkiloti ekspertlari qatnashdi. Anjumanda, shuningdek, YXHT Demokratik institutlar va inson huquqlari bo‘yicha byurosi missiyasi kuzatuvchilari ham ishtirok etdi.
Tadbir qatnashchilari fuqarolar saylov huquqlari ishonchli himoyasini ta’minlashning tashkiliy-huquqiy mexanizmlarini shakllantirish, fuqarolarning saylash erkinligi hamda jamiyat va davlat ishlarini boshqarishda ishtirok etish huquqini amalga oshirishning huquqiy kafolatlari borasidagi milliy hamda xorijiy tajribani ko‘rib chiqdi.
— O‘zbekistonda Prezident sayloviga tayyorgarlik ko‘rish va uni yuksak saviyada o‘tkazish yo‘lida keng ko‘lamli ishlar olib borilmoqda, — deydi huquqshunos, Konrad Adenauer nomidagi jamg‘arma eksperti X. Byuller. – Ushbu siyosiy tadbirga qizg‘in va puxta hozirlik haqida xorijdagi ommaviy axborot vositalari muntazam axborot berib borayapti. Bundan tashqari, O‘zbekistonning Germaniyadagi elchixonasida nemis ilmiy doiralari vakillari, huquqshunoslari bilan uchrashuv tashkil etildi. Unda saylov qonunchiligiga kiritilgan so‘nggi o‘zgartish hamda qo‘shimchalar, saylov kampaniyasining barcha bosqichi, O‘zbekiston Respublikasi Markaziy saylov komissiyasi, siyosiy partiyalar faoliyati haqida batafsil ma’lumot berildi. Davra suhbatida Germaniyada saylovlar va umumxalq ovoz berishining qonuniy asoslari haqida ma’ruza qildim. Umuman aytganda, bizning saylovga oid qonunlarimiz o‘zaro o‘xshash. Ularda saylovlarning asosiy demokratik tamoyillari aks ettirilgan.
— Shu kunlarda O‘zbekistonda muhim siyosiy tadbirga – Prezident sayloviga tayyorgarlik ko‘rilmoqda, — deydi Konrad Adenauer nomidagi jamg‘arma mintaqaviy vakolatli vakili T. Kunse. — Mamlakat xalq uchun g‘oyat muhim bo‘lgan bunday tadbirni tashkil qilish bo‘yicha ijobiy tajriba to‘plagan. Shuningdek, qonunchilik asoslarini takomillashtirishga hamda Prezidentlikka nomzodlarning saylovchilar bilan muloqotiga alohida e’tibor qaratilayotganini ta’kidlashni istardim. Joylarda uchrashuvlar videokonferensiya shaklida o‘tkazilayotgani aholining keng qatlamini qamrab olish imkonini bermoqda. Barcha nomzodga teng sharoit yaratib berilgan.
— Germaniyada saylov kampaniyasi uchun asos bo‘lgan bir qator majburiy tamoyillar mavjud, — deydi Saksoniya federal yeri Landtagi ilmiy xodimi, Konrad Adenauer nomidagi jamg‘arma eksperti R. Falkner. — Saylovlar erkin, to‘g‘ridan-to‘g‘ri va yashirin ovoz berish yo‘li bilan umumxalq ishtirokida o‘tkazilishi kerak. Germaniyada saylov huquqini amalga oshirishning amaliy jihatlari haqidagi ma’ruzamda davlatimizning ushbu masaladagi qarashlarini so‘zlab berdim. O‘zbekistonda ham Germaniya intiladigan ikkita umumiy tamoyil bor. Bu saylovlarni tashkil qilish doirasida tegishli chora-tadbirlarning oshkoraligi va mas’ulligidir.
Germaniyalik ekspertlar O‘zbekiston va Germaniya hamda boshqa mamlakatlar saylov tizimlarini taqqoslab, demokratik saylovlarning umume’tirof etilgan tamoyil va standartlari, Inson huquqlari bo‘yicha umumjahon deklaratsiyasi, Fuqarolik va siyosiy huquqlar bo‘yicha xalqaro pakt, Insoniylik mezonlari bo‘yicha Kopengagen kengashi hujjati qoidalari O‘zbekiston saylov qonunchiligiga to‘liq implementatsiya qilinganini, hayotga samarali tatbiq etilayotganini ta’kidladi.
Izoh (0)