Donald Trampning nevarasi ishtirokidagi video Xitoy ijtimoiy tarmoqlarini “portlatdi” (video)

Xitoy ijtimoiy tarmoqlarida AQShning yangi saylangan prezidenti Donald Trampning besh yoshli nevarasi Arabella Kushner ishtirokidagi video mashhur bo‘lib ketdi.

Rolik 2016-yil boshida milliarderning qizi Ivanka Trampning Instagram’ida e’lon qilingan bo‘lsa-da, u noyabrdagina Xitoyning Weibo tarmog‘ida ommalashib ketdi.

Videoda qizcha Xitoy Yangi yili sharafiga mandarin tilida Tan sulolasi davridagi mumtoz she’rni yoddan aytib bergan. Bayram munosabati bilan Arabella qizil rangdagi an’anaviy xitoycha ko‘ylagini ham ko‘z-ko‘z qilgan.

Xitoylik internet foydalanuvchilarini kichkina qizchaning Xitoy mumtoz she’rlarini yoddan bilishi hayratda qoldirdi. “Menga Tramp umuman yoqmaydi, ammo uning farzandlari va nevaralari juda yoqimtoy”, — deb yozdi Weibo foydalanuvchilaridan biri.

Arabella Kushner Ivanka Tramp va Jared Kushnerning yagona qizi. Uning Jozef va Teodor ismli ukalari ham bor.