«Жисмоний ва юридик шахсларнинг мурожаатлари тўғрисида»ги Ўзбекистон Республикаси Қонуни талабларидан келиб чиқиб, Давлат божхона қўмитаси ва ҳудудий божхона бошқармалари раҳбарияти томонидан аҳоли ҳамда тадбиркорлар учун кунлик соат 8 дан 17 гача шахсий қабуллар ташкил қилинмоқда. Бу ҳақда «Дарё»га қўмита ахборот хизмати маълум қилди.
Аҳоли ва тадбиркорлар томонидан мурожаатларни ўз вақтида ва тезкорлик билан кўриб чиқиш мақсадида Давлат божхона қўмитаси веб-сайтидаги «Савол йўллаш» хизмати негизида «Виртуал қабулхона» ташкил қилинди. Давлат божхона қўмитаси веб-сайти орқали тез-тез йўлланадиган долзарб саволлар ва уларнинг жавоблари сайтнинг «Сўраган эдингиз!» рукни орқали эълон қилиб борилмоқда.
Веб-сайтда божхона органларининг республика (120-76-33) ва вилоятлар миқёсида фаолият олиб бораётган барча ишонч телефонлари, тадбиркорлар ва ТИФ иштирокчилари учун жорий қилинган доимий ишонч телефони (120-76-27) рақамлари алоҳида саҳифада жойлаштирилган. Жорий йилнинг ўтган даври мобайнида Давлат божхона қўмитаси ишонч телефонларига 44 та мурожаат келиб тушди.
Жойларда аҳоли ва тадбиркорлик субъектлари билан ишлашни тубдан қайта кўриб чиқиш ва уларнинг муаммолари ва эътирозларини жойида ҳал этиш, аҳоли билан ишлаш маданиятини ошириш мақсадида ДБҚ раҳбариятининг Қорақалпоғистон Республикаси, вилоятлар ва Тошкент шаҳрида жисмоний ва юридик шахсларни сайёр қабул қилиш, уларни қизиқтирган саволларга жавоб топиш ҳамда мавжуд муаммоларни ечиш бўйича учрашувлари ташкил этилмоқда. 2016 йилнинг 10 ойи давомида ДБҚ раҳбарияти томонидан жами 115 маротаба жисмоний шахслар ёки юридик шахсларнинг вакиллари қабул қилиниб, кўтарилган масалалари ижобий ҳал этилди.
Жорий йилнинг ўтган 10 ойи давомида ДБҚга жисмоний ва юридик шахслардан жами 959 та мурожаат келган. Шундан 412 таси ёки 42,9 фоизи Ягона интерактив давлат хизматлари портали орқали келиб тушди.
Мурожаатлар таҳлили шуни кўрсатадики, божхона ходимларининг ноқонуний ҳаракатлари бўйича 85 та, ишдан (ўқишдан) ноқонуний бўшатилганлиги ва ишга (ўқишга) тиклаш тўғрисида 149 та, божхона назоратини ўтказиш ва расмийлаштирув тўғрисида 485 та, божхона тўловларидан озод қилиш ва имтиёзлар тўғрисида 91 та, мусодара этилган товар-моддий бойликлари ёки жарималарни қайтариш тўғрисида 31 та ва 118 та бошқа масалаларга доир мурожаат келиб тушди.
Ўзбекистон Республикаси Бош вазирининг виртуал қабулхонаси орқали жорий йил 10 ноябрига қадар жисмоний ва юридик шахслардан божхона органларига 241 та (жисмоний шахслардан 204 та, юридик шахслардан 37 та) мурожаат келиб тушди. Уларнинг 92 таси божхона органларида ишга ёки ўқишга тиклаш масалаларини қамраб олган бўлса, божхона назорати ва расмийлаштируви, божхона имтиёзларини қўллашга доир мурожаатлар 63 тани ташкил қилди. Мурожаатларнинг 43 таси эса мусодара этилган товар-моддий бойликлари ёки жарималарни қайтариш тўғрисида, 27 таси божхона ходимларининг ноқонуний ҳаракатлари бўйича, 16 таси турли масалаларга оид.
ДБҚда қайд этилган мурожаатлар таҳлили шуни кўрсатадики, аксарият ҳолларда жисмоний ва юридик шахсларни божхона расмийлаштируви ҳамда имтиёзлар билан боғлиқ масалалар қизиқтиради. Жумладан, 2016 йил 10 ойи давомида келиб тушган мурожаатларнинг 576 таси ёки жами мурожаатларнинг 60 фоизи айнан божхона расмийлаштируви ёхуд божхона тўловларидан имтиёзлар қўллаш масалаларига тегишли.
Масалан, Давлат божхона қўмитасига ёзма равишда мурожаат қилган «Сонора» компанияси раҳбари Н.Йонасснинг мурожаати ижобий ҳал қилиниб, унга тегишли товарларни расмийлаштириш чоғида ортиқча тўланган 512 минг сўмдан ортиқ божхона тўлови қисқа фурсатда қайтариб берилди.
Давлат божхона қўмитаси веб-сайти орқали мурожаат йўллаган Р.Феттаев ўз мурожаатида у фаолият юритаётган «Асака Коттон Импекс» МЧЖ хорижий давлатдаги ҳамкори билан товарларни экспорт қилиш бўйича экспорт шартномасини имзолаганини маълум қилган. Шартнома имзоланиб, «Ангрен» ташқи иқтисодий фаолият божхона постида ҳисобга қўйилади. Шу орада хорижий шерикларнинг банк реквизитлари ўзгаргани боис томонлар шартномага қўшимча келишувни имзолади. Аммо мазкур келишув аввалги реквизитлар асосида ҳисобга қўйилгани боис тадбиркорнинг товари хорижга чиқмай туриб қолади. Мазкур мурожаат зудлик билан ўрганиб чиқилиб, Ташқи савдо операцияларининг ягона ахборот тизимидаги маълумотларга тегишли тузатишлар киритилади. Натижада тадбиркор мурожаат қилган куннинг ўзидаёқ юкларини хорижга экспорт қилишга муваффақ бўлди.
Ягона интерактив давлат хизматлари портали орқали Навоийдан мурожаат йўллаган «Навоий пряжа» ишлаб чиқарувчи савдо фирмаси директори В. Жукова жун ва сунъий толани қайта ишлаш учун 350 минг АҚШ долллари қийматидаги янги замонавий технологик асбоб-ускуналарни олиб кирмоқчи эканлигини маълум қилади ва мазкур товарларнинг божхона расмийлаштирувини амалга оширишда амалий ёрдам сўрайди. В. Жукованинг мурожаати ўз вақтида кўриб чиқилиб, «Навоий» ташқи иқтисодий фаолият божхона пости томонидан мазкур ташкилотга тегишли юкларнинг божхона расмийлаштируви қисқа фурсатда амалга оширилди. Энг муҳими, мазкур жараёнларда унга божхона тўловларидан 213 миллион сўмдан ортиқ миқдорда божхона имтиёзлари қўлланилди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)