O‘zbekistondan mag‘lub bo‘lsa ishdan ketadigan Uli Shtilike shogirdlari ham ruhan, ham jismonan tayyorligini aytdi

Futbol bo‘yicha Janubiy Koreya terma jamoasi bosh murabbiyi Uli Shtilike 15-noyabr kuni O‘zbekistonga qarshi bo‘lib o‘tadigan o‘yin oldidan o‘z fikrlari bilan o‘rtoqlashdi, deb yozdi “Championat.asia”.

“So‘nggi bosqichda har bir o‘yin qiyin kechmoqda. Ertangi uchrashuvga ko‘p narsa bog‘liq”, — deb gap boshladi Shtilike. Avvalroq Janubiy Koreya terma jamoasi O‘zbekistonga imkoniyatni boy bersa, nemis mutaxassisi iste’foga chiqishi haqida xabar paydo bo‘lgandi.

“O‘zbekiston so‘nggi besh uchrashuvda faqatgina bir marta — Erondan gol o‘tkazib yubordi. Bundan ko‘rinib turibdiki, raqibning himoyasi mustahkam. Kanada bilan bellashuv kabi o‘ynay olsak, hammasi joyida bo‘ladi. O‘sha kuni himoyamiz ham, hujum chizig‘i ham yaxshi o‘ynadi”, — dedi Kanadani 2:0 hisobida mag‘lub etgan jamoa bosh murabbiyi.

“Ishontirib aytamanki, futbolchilar bo‘lajak o‘yinga ham ruhiy, ham jismoniy tomonlama tayyor. Uchrashuv mas’uliyatini hamma birdek tushunib turibdi”.

Ma’lumot uchun, Janubiy Koreya — O‘zbekiston o‘yini 15-noyabr kuni Toshkent vaqti bilan 16:00 da start oladi.