Kamida 196 kishi AQShda Donald Trampning AQSh prezidenti etib saylanganiga qarshi ommaviy norozilik aksiyalarining uchinchi kunida politsiya uchastkalariga tushdi, deb yozadi “Interfaks”.
Xususan, Kaliforniya shtatining Los-Anjeles shahrida 185 kishi, Oklend shahrida yana 11 kishi hibsga olindi. Los-Anjeles meri Erik Garsetti so‘zlariga ko‘ra, “odamlarning juda, juda kichik guruhigina” talon-taroj harakatlarini amalga oshirgan va ko‘chadagi harakatni to‘sib qo‘ygan. Mer, shuningdek, jamoatchilik tartibiga rioya qilgan minglab namoyishchilar yuzasidan faxr bildirdi.
Los-Anjelesdagi norozilik aksiyalari natijasida bir kishi — politsiya ofitseri jabrlandi.
Oklendda esa namoyishchilar axlat qutilarini yoqib yubordi, vitrinalarni sindirdi va binolarga graffiti chizdi. 11-noyabr, jumaga o‘tar kechasi namoyishchilarning katta qismi Oklend meriyasi oldidagi maydonga to‘plandi va Trampning saylanishiga qarshi shiorlarni baqirib aytdi.
Oklendda jami mingga yaqin kishi aksiyada qatnashgani xabar berilmoqda.
Izoh (0)