Hindiston poytaxtida havoning ifloslanish darajasi oxirgi 17 yil mobaynidagi eng yuqori ko‘rsatkichni tashkil etib, me’yordagidan 16 marotaba oshib ketganidan so‘ng mamlakat hukumati vaziyatni favqulodda deb baholashga majbur bo‘ldi. Maktablar yopildi, mahalliy aholining aksariyat qismi shaharni tark etib, holat o‘nglanishini boshqa mintaqalarda kutishni ma’qul ko‘rmoqda. Bu haqda TJournal xabar berdi.
Nyu-Dehli ma’muriyati rahbari Arvind Kejrival vaziyatni gaz kamerasiga qiyosladi. Chindan ham, bir haftadan beri megapolisdagi havo sifati indeksi (AQI) “qizil hudud”da bo‘lib turibdi. Garchi poytaxt doimo havo sifati yomon shaharlar ro‘yxatida yetakchi o‘rinlarni egallab kelgan bo‘lsa-da, hozirgidek holat hatto bu yerda ham kuzatilmagandi.
Nyu-Dehlida avtotransport harakati, qurilish ishlari va binolar buzilishi, dizel-generatorlardan foydalanishga cheklov o‘rnatildi. Rasmiylar vaziyatni o‘nglash uchun Xitoydan o‘rnak olib, ulkan ko‘cha changtyutgichlari yoki tumanni tarqatuvchi zambaraklardan foydalanishni rejalashtirmoqda. Biroq bu borada yaqinlashayotgan qish va uning shamol-yomg‘iri asosiy ko‘makchi bo‘lishi ehtimolga yaqinroq.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)