Ҳиндистон пойтахтида ҳавонинг ифлосланиш даражаси охирги 17 йил мобайнидаги энг юқори кўрсаткични ташкил этиб, меъёрдагидан 16 маротаба ошиб кетганидан сўнг мамлакат ҳукумати вазиятни фавқулодда деб баҳолашга мажбур бўлди. Мактаблар ёпилди, маҳаллий аҳолининг аксарият қисми шаҳарни тарк этиб, ҳолат ўнгланишини бошқа минтақаларда кутишни маъқул кўрмоқда. Бу ҳақда TJournal хабар берди.
Нью-Деҳли маъмурияти раҳбари Арвинд Кежривал вазиятни газ камерасига қиёслади. Чиндан ҳам, бир ҳафтадан бери мегаполисдаги ҳаво сифати индекси (AQI) «қизил ҳудуд»да бўлиб турибди. Гарчи пойтахт доимо ҳаво сифати ёмон шаҳарлар рўйхатида етакчи ўринларни эгаллаб келган бўлса-да, ҳозиргидек ҳолат ҳатто бу ерда ҳам кузатилмаганди.
Нью-Деҳлида автотранспорт ҳаракати, қурилиш ишлари ва бинолар бузилиши, дизель-генераторлардан фойдаланишга чеклов ўрнатилди. Расмийлар вазиятни ўнглаш учун Хитойдан ўрнак олиб, улкан кўча чангтютгичлари ёки туманни тарқатувчи замбараклардан фойдаланишни режалаштирмоқда. Бироқ бу борада яқинлашаётган қиш ва унинг шамол-ёмғири асосий кўмакчи бўлиши эҳтимолга яқинроқ.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)