29-oktabr kuni Dushanbeda (Tojikiston) U-19 yosh toifasidagi qizlar jamoalari o‘rtasidagi 2017-yilgi Osiyo chempionatining saralash turniri ikkinchi turi doirasida O‘zbekiston terma jamoasi Gonkongni 3:0 hisobida mag‘lub etdi. Bu haqda “Gazeta.uz” xabar bermoqda.
Milliy terma jamoa a’zolari Feruza Boboxo‘jayeva (53-daqiqa) va Shahnoza Qurbonova (78 va 79-daqiqalar) raqib darvozasiga to‘p kiritdi. Qurbonova dubl muallifiga aylandi.
Ikkinchi tur natijalariga ko‘ra B guruhida 6 ochko jamg‘argan O‘zbekiston birinchi o‘rinni Xitoy Taybeyi jamoasi bilan bo‘lishib turibdi. Taybeyliklar 2:5 hisobida Tojikiston termasi ustidan g‘alaba qozondi.
Chempionatning final bosqichiga saralash turniri g‘oliblari chiqadi. Ular oxirgi qit’a birinchiligining to‘rt eng kuchli jamoasi — Yaponiya, KXDR, Janubiy Koreya va Xitoy qatoriga qo‘shiladi. Ushbu sakkiz jamoa 2017-yil avgustida Xitoyda bo‘lib o‘tadigan Osiyo Kubogi bahslarida ishtirok etadi.
Bahrom Norsafarov shogirdlari 31-oktabr kuni oxirgi uchrashuvni Xitoy Taybeyiga qarshi o‘tkazadi. O‘zbekistonliklar g‘alaba qozonsa, 2017-yilgi Osiyo chempionatiga yo‘llanmani qo‘lga kiritadi.
Izoh (0)