Futbol bo‘yicha O‘zbekiston milliy terma jamoasi JCh—2018 saralashi doirasida Janubiy Koreyaga qarshi o‘yinga tayyorgarlik ko‘rishi uchun O‘zbekiston Kubogi taqvimi o‘zgardi. Bu haqda O‘zbekiston Professional futbol ligasi matbuot xizmati xabar bermoqda.
O‘zbekiston Kubogining bir finalchisi nomi ma’lum bo‘lib ulgurgan. 22-avgust va 21-sentabr kunlari bo‘lib o‘tgan yarmi final uchrashuvlarida Qarshining “Nasaf” jamoasi “Buxoro”ni ikki o‘yinda ham mag‘lub etgan (2:0, 2:1) va finalga yo‘l olgan.
Kubok bahslarining ikkinchi — Toshkentning “Lokomotiv” va “Bunyodkor” jamoalari o‘rtasidagi yarim finali doirasidagi birinchi o‘yin 25-oktabr kuni bo‘lib o‘tdi va unda “Lokomotv” 1:0 hisobida g‘alaba qozondi. Javob uchrashuvi qachon bo‘lishi noma’lum.
O‘zPFL tomonidan yil boshida e’lon qilingan O‘yinlar taqvimiga muvofiq, O‘zbekiston Kubogi final uchrashuvi 27-noyabr kuni o‘tkazilishi lozim edi. Biroq final o‘yini ham boshqa muddatga qoldirilgan.
“O‘zbekiston Kubogi yarim finali doirasidagi ‘Bunyodkor’ (Toshkent) — ‘Lokomotiv’ (Toshkent) uchrashuvi bo‘ladigan sana, shuningdek, final uchrashuvi bo‘ladigan sana va joy nomi keyinroq ma’lum qilinadi”, — deyiladi O‘zPFL axborotida.
Ma’lumot uchun, O‘zbekiston va Janubiy Koreya milliy terma jamoalari o‘rtasidagi JCh—2018 saralash uchrashuvi 15-noyabr kuni Seulda bo‘lib o‘tadi.
Hozirda O‘zbekiston milliy termasi saralash guruhida 4 uchrashuvdan so‘ng 9 ochko bilan ikkinchi, Janubiy Koreya esa 7 ochko bilan uchinchi o‘rinda bormoqda. Peshqadam Eron hisobida 10 ochko bor.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)