Kecha, 24-oktabr kuni Jasur Abduraimov boshchiligidagi O‘zbekiston U-19 yoshlar terma jamoasi yoshlar o‘rtasidagi Osiyo chempionatining chorak finalida Eronga (0:2) imkoniyatni boy berib, Jahon chempionati yo‘llanmasidan quruq qoldi.
Bahrayndagi musobaqa O‘zbekiston U-19 termasi uchun Osiyo chempionatlaridagi yettinchi ishtirok etdi. O‘zbekiston yoshlar termasi qit’a birinchiliklarining to‘rttasida chorak finaldan muvaffaqiyatli o‘tib, Jahon chempionati yo‘llanmasiga ega chiqqan.
2002-yilda Qatarda o‘tkazilgan Osiyo chempionatida Viktor Borisov boshchiligidagi yoshlar termasi chorak finalda Suriyani 4:0 hisobida taslim etib, mundial yo‘llanmasiga ega bo‘lgan ilk O‘zbekiston jamoasiga aylangandi. Oradan olti yil o‘tib Ahmad Ubaydullayev boshchiligidagi jamoa 1/4 finalda Xitoyni penaltilar seriyasida mag‘lub etib, Jahon chempionatiga yo‘l olgandi. Ubaydullayev shogirdlari Saudiya Arabistonidagi Osiyo chempionatida finalgacha yetib borib, O‘zbekiston yoshlar termasining qit’a birinchiligidagi eng yaxshi natijasini qayd etgan.
2012-yilgi Osiyo chempionatining chorak finalida O‘zbekiston yana Suriyaga qarshi to‘qnash kelgandi. Ahmad Musayev shogirdlari penaltilar seriyasida arablarga hech qanday imkoniyat qoldirmagan. 2014-yilda Ravshan Haydarov boshchiligidagi O‘zbekiston yoshlar termasi OChning chorak finalida Tailanddan ustun kelgandi.
Izoh (0)