Футбол бўйича Ўзбекистон миллий терма жамоаси ЖЧ—2018 саралаши доирасида Жанубий Кореяга қарши ўйинга тайёргарлик кўриши учун Ўзбекистон Кубоги тақвими ўзгарди. Бу ҳақда Ўзбекистон Профессионал футбол лигаси матбуот хизмати хабар бермоқда.
Ўзбекистон Кубогининг бир финалчиси номи маълум бўлиб улгурган. 22 август ва 21 сентябрь кунлари бўлиб ўтган ярми финал учрашувларида Қаршининг «Насаф» жамоаси «Бухоро»ни икки ўйинда ҳам мағлуб этган (2:0, 2:1) ва финалга йўл олган.
Кубок баҳсларининг иккинчи — Тошкентнинг «Локомотив» ва «Бунёдкор» жамоалари ўртасидаги ярим финали доирасидаги биринчи ўйин 25 октябрь куни бўлиб ўтди ва унда «Локомотв» 1:0 ҳисобида ғалаба қозонди. Жавоб учрашуви қачон бўлиши номаълум.
ЎзПФЛ томонидан йил бошида эълон қилинган Ўйинлар тақвимига мувофиқ, Ўзбекистон Кубоги финал учрашуви 27 ноябрь куни ўтказилиши лозим эди. Бироқ финал ўйини ҳам бошқа муддатга қолдирилган.
«Ўзбекистон Кубоги ярим финали доирасидаги ‘Бунёдкор’ (Тошкент) — ‘Локомотив’ (Тошкент) учрашуви бўладиган сана, шунингдек, финал учрашуви бўладиган сана ва жой номи кейинроқ маълум қилинади», — дейилади ЎзПФЛ ахборотида.
Маълумот учун, Ўзбекистон ва Жанубий Корея миллий терма жамоалари ўртасидаги ЖЧ—2018 саралаш учрашуви 15 ноябрь куни Сеулда бўлиб ўтади.
Ҳозирда Ўзбекистон миллий термаси саралаш гуруҳида 4 учрашувдан сўнг 9 очко билан иккинчи, Жанубий Корея эса 7 очко билан учинчи ўринда бормоқда. Пешқадам Эрон ҳисобида 10 очко бор.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)