O‘zbek tili va adabiyoti universiteti talabalarining yotoqxona yetishmovchiligi bilan bog‘liq muammosi Bosh vazir virtual qabulxonasi orqali hal etildi

O‘zbekiston Respublikasi Bosh vazirining virtual qabulxonasiga aholi tomonidan kelib tushayotgan murojaatlar ijobiy hal etilmoqda. Xususan, Oliy va o‘rta maxsus ta’lim vazirligi faoliyatiga daxldor murojaatlar ham belgilangan tartibda ko‘rib chiqilmoqda. Bosh vazirning elektron qabulxonasi orqali fuqarolarning ko‘plab muammolari o‘z yechimini topmoqda, deyiladi “Toshkent” teleradiokanalining “Poytaxt” informatsion dasturida.

Toshkent davlat pedagogika universiteti dotsenti Dildora Yunusova

- Nizomiy nomidagi Toshkent davlat pedagogika universiteti boshlang‘ich ta’lim jismoniy madaniyat fakultetida dotsent vazifasini bajarib ishlab kelmoqda edim. Men 2 oyga O‘zbekiston davlat jismoniy tarbiya institutiga malaka oshirishga jo‘natilgan edim. “2 oy mobaynida yillik hisobot topshirmadinglar”, deb sababsiz rahbariyat ishdan bo‘shatib yubordi. Aslida biz malaka oshirishda edik. Shuning uchun men 2016-yil 16-oktabr kuni O‘zbekiston Respublikasi Bosh vazirining virtual qabulxonasiga ariza bilan murojaat etdim. 3 kun mobaynida ish ko‘rib chiqilib, ijobiy tomonga hal etildi.

Tadbirkor Azizbek Temurov

- Toshkent shahri “Ekofutlayn MSJ”da rahbarlik lavozimida ishlayman. 2016-yil 26-avgust kuni Uchtepa tuman hokimligida tender tanlov o‘tkazilgan. Ushbu tender tanlovda Toshkent birinchi yuridik kollejining 2016-2017-o‘quv yillaridagi oshxona faoliyatini yuritish bo‘yicha bizning korxona g‘olib deb topildi hamda ushbu faoliyatni boshlashda hujjat rasmiylashtirilishi bo‘yicha to‘sqinliklar bo‘ldi. To‘sqinliklar bo‘yicha 2016-yil 5-oktabr kuni O‘zbekiston Respublikasi Bosh vaziri elektron portaliga murojaat etdik. Ushbu portal 3 kun ichida bizni kollej oshxonasida faoliyat yuritishimiz masalasini ko‘rib chiqib, hujjatlarni rasmiylashtirilishi bo‘yicha barcha to‘sqinliklarni bartaraf etdi, hozirgi kunda korxonamiz faoliyatini ta’mirlash va jihozlash ishlari olib borilmoqda. Ushbu murojaat bo‘yicha O‘zbekiston Respublika Bosh vaziri Shavkat Mirziyoyev Miromonovichga o‘z minnatdorchiligimizni bildiramiz. Kelajakda ushbu ishonchni oqlashga harakat qilamiz.

Talaba Dilnoza Jo‘rayeva

- Men Alisher Navoiy nomidagi Toshkent davlat o‘zbek tili va adabiyoti universiteti 4-bosqich talabasiman. Bizning universitetimiz yangi ochilganligi munosabati bilan yil boshida talabalar turar joylari yetishmovchiligi kelib chiqdi. Biz talabalar Bosh vazir virtual qabulxonasiga murojaat etdik va murojaatimiz 3 kun ichida ko‘rib chiqildi va ijobiy tomonga hal etib berildi.