Ўзбек тили ва адабиёти университети талабаларининг ётоқхона етишмовчилиги билан боғлиқ муаммоси Бош вазир виртуал қабулхонаси орқали ҳал этилди
Ўзбекистон Республикаси Бош вазирининг виртуал қабулхонасига аҳоли томонидан келиб тушаётган мурожаатлар ижобий ҳал этилмоқда. Хусусан, Олий ва ўрта махсус таълим вазирлиги фаолиятига дахлдор мурожаатлар ҳам белгиланган тартибда кўриб чиқилмоқда. Бош вазирнинг электрон қабулхонаси орқали фуқароларнинг кўплаб муаммолари ўз ечимини топмоқда, дейилади «Тошкент» телерадиоканалининг «Пойтахт» информацион дастурида.
Тошкент давлат педагогика университети доценти Дилдора Юнусова
Фото: «Тошкент» телерадиоканали- Низомий номидаги Тошкент давлат педагогика университети бошланғич таълим жисмоний маданият факультетида доцент вазифасини бажариб ишлаб келмоқда эдим. Мен 2 ойга Ўзбекистон давлат жисмоний тарбия институтига малака оширишга жўнатилган эдим. «2 ой мобайнида йиллик ҳисобот топширмадинглар», деб сабабсиз раҳбарият ишдан бўшатиб юборди. Аслида биз малака оширишда эдик. Шунинг учун мен 2016 йил 16 октябрь куни Ўзбекистон Республикаси Бош вазирининг виртуал қабулхонасига ариза билан мурожаат этдим. 3 кун мобайнида иш кўриб чиқилиб, ижобий томонга ҳал этилди.
Тадбиркор Азизбек Темуров
Фото: «Тошкент» телерадиоканали- Тошкент шаҳри «Экофутлайн МСЖ»да раҳбарлик лавозимида ишлайман. 2016 йил 26 август куни Учтепа туман ҳокимлигида тендер танлов ўтказилган. Ушбу тендер танловда Тошкент биринчи юридик коллежининг 2016-2017-ўқув йилларидаги ошхона фаолиятини юритиш бўйича бизнинг корхона ғолиб деб топилди ҳамда ушбу фаолиятни бошлашда ҳужжат расмийлаштирилиши бўйича тўсқинликлар бўлди. Тўсқинликлар бўйича 2016 йил 5 октябрь куни Ўзбекистон Республикаси Бош вазири электрон порталига мурожаат этдик. Ушбу портал 3 кун ичида бизни коллеж ошхонасида фаолият юритишимиз масаласини кўриб чиқиб, ҳужжатларни расмийлаштирилиши бўйича барча тўсқинликларни бартараф этди, ҳозирги кунда корхонамиз фаолиятини таъмирлаш ва жиҳозлаш ишлари олиб борилмоқда. Ушбу мурожаат бўйича Ўзбекистон Республика Бош вазири Шавкат Мирзиёев Миромоновичга ўз миннатдорчилигимизни билдирамиз. Келажакда ушбу ишончни оқлашга ҳаракат қиламиз.
Талаба Дилноза Жўраева
Фото: «Тошкент» телерадиоканали
- Мен Алишер Навоий номидаги Тошкент давлат ўзбек тили ва адабиёти университети 4-босқич талабасиман. Бизнинг университетимиз янги очилганлиги муносабати билан йил бошида талабалар турар жойлари етишмовчилиги келиб чиқди. Биз талабалар Бош вазир виртуал қабулхонасига мурожаат этдик ва мурожаатимиз 3 кун ичида кўриб чиқилди ва ижобий томонга ҳал этиб берилди.
Изоҳ (0)