Qozog‘istonda 24-oktabr, dushanba kuni Olmaota va Aqto‘bedagi teraktlar ishi bo‘yicha asosiy sud jarayonlari boshlandi. Bu haqda “TASS” xabar berdi.
18-iyul kuni Olmaotada IIB binosi va Milliy xavfsizlik qo‘mitasi departamentiga hujum qilgan Qizilo‘rda viloyatining 27 yoshli fuqarosi Ruslan Kulekbayevning ishi bo‘yicha sud jarayoni ayblanuvchi saqlanayotgan tergov izolyatorida o‘tkazilmoqda.
Tergov guruhi tomonidan voqea tafsilotlarini aniqlash maqsadida 57 ta sud ekspertizasi va tadqiqoti o‘tkazilib, 200 dan ortiq guvoh so‘roq qilingan.
Shuningdek, sudga Kulekbayev bilan hujum uyushtirish va noqonuniy qurol saqlash, qurol sotib olish va o‘qotar qurollar yasashda ayblanayotgan besh kishi ham topshirilgan.
Ish bo‘yicha 23 nafar jabrlanuvchi, 72 nafar guvoh qatnashmoqda, sudlanuvchilar manfaatlarini olti nafar advokat himoya qilmoqda.
Ushbu jarayon bilan parallel ravishda Jinoyat ishlari bo‘yicha Aqto‘be viloyat tumanlararo ixtisoslashtirilgan sudi salafiylik tarafdorlarining bir guruhini sud qilmoqda. Ular 5-iyun kuni qurol-yarog‘ do‘konlariga va Aqto‘be Milliy gvardiyasi harbiy qismiga hujum qilgan edi.
Ish bo‘yicha 29 kishi sudlanmoqda, jinoyat ishi 201 ta jilddan iborat. Sudlanuvchilarning manfaatlarini 27 nafar advokat himoya qilmoqda. Ishda 48 kishi guvoh tariqasida qatnashayotgan bo‘lsa, 101 kishi jabrlanuvchi maqomini olgan.
Izoh (0)