Қозоғистонда 24 октябрь, душанба куни Олмаота ва Ақтўбедаги терактлар иши бўйича асосий суд жараёнлари бошланди. Бу ҳақда «ТАСС» хабар берди.
18 июль куни Олмаотада ИИБ биноси ва Миллий хавфсизлик қўмитаси департаментига ҳужум қилган Қизилўрда вилоятининг 27 ёшли фуқароси Руслан Кулекбаевнинг иши бўйича суд жараёни айбланувчи сақланаётган тергов изоляторида ўтказилмоқда.
Тергов гуруҳи томонидан воқеа тафсилотларини аниқлаш мақсадида 57 та суд экспертизаси ва тадқиқоти ўтказилиб, 200 дан ортиқ гувоҳ сўроқ қилинган.
Шунингдек, судга Кулекбаев билан ҳужум уюштириш ва ноқонуний қурол сақлаш, қурол сотиб олиш ва ўқотар қуроллар ясашда айбланаётган беш киши ҳам топширилган.
Иш бўйича 23 нафар жабрланувчи, 72 нафар гувоҳ қатнашмоқда, судланувчилар манфаатларини олти нафар адвокат ҳимоя қилмоқда.
Ушбу жараён билан параллел равишда Жиноят ишлари бўйича Ақтўбе вилоят туманлараро ихтисослаштирилган суди салафийлик тарафдорларининг бир гуруҳини суд қилмоқда. Улар 5 июнь куни қурол-яроғ дўконларига ва Ақтўбе Миллий гвардияси ҳарбий қисмига ҳужум қилган эди.
Иш бўйича 29 киши судланмоқда, жиноят иши 201 та жилддан иборат. Судланувчиларнинг манфаатларини 27 нафар адвокат ҳимоя қилмоқда. Ишда 48 киши гувоҳ тариқасида қатнашаётган бўлса, 101 киши жабрланувчи мақомини олган.
Изоҳ (0)