O‘zbekiston elektron ommaviy axborot vositalari milliy assotsiatsiyasida 23-oktabr, yakshanba kuni saylov jarayonini yoritish bo‘yicha xalqaro tajribani o‘rganishga bag‘ishlangan seminar-treninglarning ochilish marosimi bo‘lib o‘tdi. Tadbirda O‘EOAVMA, nodavlat teleradiostudiyalar vakillari, Adenauer nomli jamg‘armaning Markaziy Osiyodagi vakolatxonasi, shuningdek, O‘zbekiston Markaziy saylov komissiyasi ekspertlari ishtirok etdi. Bu haqda assotsiatsiya saytida ma’lum qilindi.
Treninglarni yetakchi nemis ekspertlari — Germaniya telekompaniyalar federal uyushmasi prezidenti Rene Falkner va taniqli mustaqil jurnalist Birgit Vetsel olib boradi.
Rene Falkner 11 kun davomida seminar ishtirokchilari bilan yangi texnologik ishlanmalar yordamida tok-shoular tayyorlash yuzasidan jahon tajribasi bilan o‘rtoqlashadi. Radiojurnalistlar Birgit Vetsel boshchiligida 4 kun davomida efirni yangi yo‘nalishdagi eshittirishlar bilan to‘ldirishning eng ilg‘or uslublari, axborot uzatishning nostandart usullari va tinglovchini jalb qilish imkoniyatlari bilan tanishadi.
Konrad Adenauer nomli jamg‘armaning Markaziy Osiyodagi vakolatxonasi vakili doktor Tomas Kunse mazkur mashg‘ulotlar O‘zbekiston Respublikasi Prezidenti saylovining professional darajada yoritilishiga o‘z hissasini qo‘shishidan umidvorligini bildirdi.
— Ushbu seminarlar assotsiatsiyamizga a’zo jurnalistlarning O‘zbekiston Respublikasi Prezidenti saylovini yoritish borasidagi mahoratini oshirishga qaratilgan tadbirlarning dastlabkisi. Qator xalqaro tashkilotlar ko‘magida bunday treninglarni yana tashkillashtirish rejalashtirilgan, — deya ta’kidladi assotsiatsiya raisi Firdavs Abduxoliqov.
Seminar-treninglar noyabr oxiriga qadar davom etadi.
Izoh (0)