Ўзбекистон электрон оммавий ахборот воситалари миллий ассоциациясида 23 октябрь, якшанба куни сайлов жараёнини ёритиш бўйича халқаро тажрибани ўрганишга бағишланган семинар-тренингларнинг очилиш маросими бўлиб ўтди. Тадбирда ЎЭОАВМА, нодавлат телерадиостудиялар вакиллари, Аденауэр номли жамғарманинг Марказий Осиёдаги ваколатхонаси, шунингдек, Ўзбекистон Марказий сайлов комиссияси экспертлари иштирок этди. Бу ҳақда ассоциация сайтида маълум қилинди.
Тренингларни етакчи немис экспертлари — Германия телекомпаниялар федерал уюшмаси президенти Рене Фалькнер ва таниқли мустақил журналист Биргит Вецель олиб боради.
Рене Фалькнер 11 кун давомида семинар иштирокчилари билан янги технологик ишланмалар ёрдамида ток-шоулар тайёрлаш юзасидан жаҳон тажрибаси билан ўртоқлашади. Радиожурналистлар Биргит Вецель бошчилигида 4 кун давомида эфирни янги йўналишдаги эшиттиришлар билан тўлдиришнинг энг илғор услублари, ахборот узатишнинг ностандарт усуллари ва тингловчини жалб қилиш имкониятлари билан танишади.
Конрад Аденауэр номли жамғарманинг Марказий Осиёдаги ваколатхонаси вакили доктор Томас Кунце мазкур машғулотлар Ўзбекистон Республикаси Президенти сайловининг профессионал даражада ёритилишига ўз ҳиссасини қўшишидан умидворлигини билдирди.
— Ушбу семинарлар ассоциациямизга аъзо журналистларнинг Ўзбекистон Республикаси Президенти сайловини ёритиш борасидаги маҳоратини оширишга қаратилган тадбирларнинг дастлабкиси. Қатор халқаро ташкилотлар кўмагида бундай тренингларни яна ташкиллаштириш режалаштирилган, — дея таъкидлади ассоциация раиси Фирдавс Абдухолиқов.
Семинар-тренинглар ноябрь охирига қадар давом этади.
Изоҳ (0)