Apple iPod’ning 15-tug‘ilgan kunini nishonlamadi
23-oktabr kuni birinchi iPod mp3-pleyeri taqdimoti o‘tkazilganiga 15 yil to‘ldi. Ammo Apple kompaniyasining o‘zi mazkur sanani nishonlamaslikni ma’qul ko‘rdi, deb xabar bermoqda TJournal.
Ta’kidlanishicha, birorta matbuot xabarnomasi chiqarilmadi, Twitter’da birorta xabar qoldirilmadi.
2001-yili 399 dollar narxda chiqarilgan iPod o‘z payti uchun favqulodda ko‘rsatkichlarga ega edi: 184 gramm vazn, 18 millimetr qalinlik, 5 Gb xotira. Pleyer cho‘ntakka sig‘ar edi. Undagi FireWire interfeysi orqali o‘n sekundda uskunaga kompakt-diskdagi qo‘shiqlarni o‘tkazish mumkin edi.
Original iPod’ning bozori 13 yil davomida chaqqon bo‘ldi, uning besh modifikatsiyasi 2010-yilga qadar 257 million nusxada sotildi. Ammo u paytga borib iPhone tufayli iPod’ning shuhrati ancha pasayib qolgan edi.
