“Manchester Yunayted”ning sobiq yarim himoyachisi Mads Timm o‘zining avtobiografik kitobida Manchester klubida Krishtianu Ronaldu bilan birga to‘p surgan davrlarni yodga oldi. Bu haqda “Sports.ru” nashri xabar bermoqda.
“U jamoaviy o‘yinga mutlaqo befarq. Ronaldu har doim: ‘Men, men, men’, deydi. U shuncha muvaffaqiyatga erishganiga qaramay, hali ham birorta jamoadoshi uning o‘rniga gol ursa, achchiqlanadi. Ronalduning mentaliteti menga o‘zimning 12 yoshligimni eslatadi”, — dedi Mads Timm.
Timmning fikricha, Ronaldu odamlar u haqida nima deb o‘ylayotgani haqida qayg‘urmaydi, uni professional futbolda saqlab qola olgan jihatlardan biri ham aynan shudir.
“Ronaldu mening to‘liq qarama-qarshi variantim. Men Manchesterdagi muhitni umuman yoqtirmasdim, u esa aksincha. Ronaldu bor e’tiborni o‘ziga qaratgan va o‘ziga qattiq ishonardi, bu narsa maydonda ham o‘z aksini topgan”, — dedi Mads Timm.
“Yodimda, mashg‘ulotlarning birida men chap qanotda, Ronaldu esa menga qarshi o‘ng qanotda o‘ynadi. Har safar to‘qnash kelganimizda u mening oldimdan uchib o‘tib ketardi. Odatda mashg‘ulotlardan keyin hech qachon nafas yetishmovchiligidan aziyat chekmasdim, biroq o‘shanda charchab qolganim rost”, — deya qo‘shimcha qildi sobiq futbolchi.
Daniyalik Mads Timm 2002—2006-yillarda “Manchester Yunayted” futbolchisi bo‘lgan va asosiy vaqtni boshqa jamoalarda ijarada o‘tkazgan. 2009-yil avgustida ketma-ket jarohatlar va ishtiyoq so‘ngani sabab faoliyatini yakunlagan, biroq 2011-yili Daniyaning “Kerteminde” klubida faoliyatini qayta boshlagani haqida xabarlar paydo bo‘lgan edi.
Izoh (0)