«Манчестер Юнайтед»нинг собиқ ярим ҳимоячиси Мадс Тимм ўзининг автобиографик китобида Манчестер клубида Криштиану Роналду билан бирга тўп сурган даврларни ёдга олди. Бу ҳақда «Sports.ru» нашри хабар бермоқда.
«У жамоавий ўйинга мутлақо бефарқ. Роналду ҳар доим: ‘Мен, мен, мен’, дейди. У шунча муваффақиятга эришганига қарамай, ҳали ҳам бирорта жамоадоши унинг ўрнига гол урса, аччиқланади. Роналдунинг менталитети менга ўзимнинг 12 ёшлигимни эслатади», — деди Мадс Тимм.
Тиммнинг фикрича, Роналду одамлар у ҳақида нима деб ўйлаётгани ҳақида қайғурмайди, уни профессионал футболда сақлаб қола олган жиҳатлардан бири ҳам айнан шудир.
«Роналду менинг тўлиқ қарама-қарши вариантим. Мен Манчестердаги муҳитни умуман ёқтирмасдим, у эса аксинча. Роналду бор эътиборни ўзига қаратган ва ўзига қаттиқ ишонарди, бу нарса майдонда ҳам ўз аксини топган», — деди Мадс Тимм.
«Ёдимда, машғулотларнинг бирида мен чап қанотда, Роналду эса менга қарши ўнг қанотда ўйнади. Ҳар сафар тўқнаш келганимизда у менинг олдимдан учиб ўтиб кетарди. Одатда машғулотлардан кейин ҳеч қачон нафас етишмовчилигидан азият чекмасдим, бироқ ўшанда чарчаб қолганим рост», — дея қўшимча қилди собиқ футболчи.
Даниялик Мадс Тимм 2002—2006 йилларда «Манчестер Юнайтед» футболчиси бўлган ва асосий вақтни бошқа жамоаларда ижарада ўтказган. 2009 йил августида кетма-кет жароҳатлар ва иштиёқ сўнгани сабаб фаолиятини якунлаган, бироқ 2011 йили Даниянинг «Кертеминде» клубида фаолиятини қайта бошлагани ҳақида хабарлар пайдо бўлган эди.
Изоҳ (0)