Go‘zallikning 7 retsepti: bodom yog‘i

Bodom yog‘i sakkiz ming yildan buyon “go‘zallik yog‘i” sifatida mashhur. Unda ko‘plab foydali kislotalar, A, F, E va B2 vitaminlari, magniy, fosfor, rux, karotin va boshqa moddalar mavjud. Xo‘sh, undan qanday foydalanish mumkin?

1. Qovoq uchun krem

Ko‘z atrofidagi mayda ajinlarni tekislash uchun uni ustki va hatto pastki qovoqqa ham surish mumkin.

2. Qarishga qarshi krem

Kosmetik bodom yog‘i tarkibida ko‘p miqdorda E vitamini bo‘lgani sababli, u ajinga qarshi krem o‘rnini bemalol bosa oladi va yuz terisini tekislab, unga taranglikni qaytaradi hamda yuz rangini tiniqlashtiradi.

3. Qo‘l uchun krem

Yog‘ tarkibidagi A vitamini terini namlantirishga va uni atrof-muhitning salbiy ta’siridan himoya qilishga yordam beradi.

4. Husnbuzarga qarshi vosita

Bodom yog‘ining antibakterial effekti muammoli yuzlarga yaxshi ta’sir qiladi. Buning uchun uni kechasi husnbuzarlar ustiga surib chiqsangiz kifoya — ertalab husnbuzardan asar ham qolmaydi.

5. Sochni o‘stirish vositasi

Sochlaringiz sekin o‘ssa, bodom yog‘idan olib, soch ildizlariga haftada 2—3 marta suring, shunda ularning o‘sish tezligi qariyb 2 marta oshadi!

6. Kuyish jarohatlariga qarshi vosita

Namlantirish, tinchlantirish va qizarishni ketkazish orqali, bodom yog‘i issiqlikdan kuygan terini parvarishlashda ajoyib vosita bo‘lib xizmat qiladi.

7. Tozalovchi losyon

Bodom yog‘i yengil strukturaga ega bo‘lib, tezda singadi va hatto suvda o‘chmaydigan makiyajni ham yaxshi tozalaydi.