Ўзбекистон Президенти вазифасини бажарувчи, Ўзбекистон бош вазири Шавкат Мирзиёев 5 октябрь куни Самарқанд вилоятига ташрифи вақтида вилоят марказида 2017 йил 21 мартга қадар трамвай қатновини йўлга қўйиш ҳақида кўрсатма берди.
Сиёбдан Сартепага
«Ўзбекистон» телеканалининг «Ахборот» кўрсатувида маълум қилинишча, Самарқанд янги трамвайнинг биринчи йўналиши Сиёб бозори ва гавжум Сартепа (Саттепо) мавзеси оралиғида қатнайди. Бахтга қарши, йўл айнан қайси кўчалардан ўтиши ҳақида ҳозирча аниқ ахборот йўқ, лекин тахмин қилиш мумкин.Масалан, «Яндекс.Карти» харита сервисига мурожаат қилинса, Сиёб бозоридан Сартепа мавзеси (аниқроғи, Сартепа парки)гача бўлган 7,6 километрлик (автомобилда 17 дақиқада босиб ўтиш мумкин бўлган) йўналишни кўриш мумкин. Google Maps харита сервиси эса бозордан мавзега автомобилда нисбатан қулай етиб олиш мумкин бўлган учта йўлни чизиб кўрсатади.
Йўллардан бири бўлажак трамвай ҳаракати учун нисбатан мақбулдек кўринади: Имом ал-Бухорий кўчасидан йўлга чиққан вагонлар Даҳбед йўли орқали Регистон кўчасига чиқади, Амир Темур ҳайкали олдидаги айланма йўлдан Бўстонсарой кўчасига бурилади, сўнг Амир Темур кўчасига чиқиб, Туркистон кўчаси билан чорраҳага қадар тўғри ҳаракатланади — сўнг Туркистон орқали Сартепа мавзесига кириб келади.
Google Maps’нинг маълумотига кўра, мазкур ҳаракат йўналиши узунлиги 8,6 километрга тенг, уни автомобилда 18—22 дақиқада босиб ўтиш мумкин. Қўшимчасига, кўрсатиб ўтилган йўлнинг Сиёб бозоридан Амир Темур — Лутфий кўчалари кесишмасигача бўлган аксарият қисмида 1947—1973 йилларда трамвай ҳам ҳаракатланган.
Қайд этиш жоиз, Facebook’даги «Самарқанд ва самарқандликлар» гуруҳи аъзоларидан бири янги трамвай Университет хиёбонидан ўтишини тахмин қилган. Лекин бу тахмин ҳақиқатдан узоқдек кўринади — трамвайнинг ушбу салқин кўча бўйлаб ҳаракатланиши учун хиёбондаги кўп йиллик дарахтларни кесишга тўғри келади.
Самарқанднинг эски трамвайи қайси кўчалардан ўтарди?
Самарқандда 1947—1973 йиллар оралиғида фаолият кўрсатган эски трамвай атиги битта йўналишдан иборат эди, у «Шаҳар темирйўл вокзали — Сиёб бозори» қатнови бўйлаб йўловчиларга хизмат кўрсатган.
У ҳозирги Имом ал-Бухорий кўчасидан йўлга чиқиб, Даҳбед йўлидан озгина юриб, сўнг ҳозирги Кўксарой майдонига бурилган, у ердан Амир Темур кўчасига кириб бориб, Лутфий кўчасига қадар тўғри ҳаракатланган, якунда Лутфий кўчаси орқали Мирзо Улуғбек ва Беруний кўчаларига чиқиб, шаҳар шимолидаги вокзалга етиб борган.
Самарқандда қандай русумдаги трамвайлар ҳаракатланади?
Катта эҳтимол билан, Тошкентдаги трамвай фаолиятининг тугатилиши билан кераксизга айланган, бироқ деярли янги — 2011—2013 йилларда Чехиядан олиб келинган Vario LF трамвайлари энди самарқандлик йўловчиларнинг узоғини яқин қилади.
«Варио»лардан ташқари, Тошкент трамвай паркининг бошқа нисбатан яхши ва соз ҳолатдаги бошқа вагонлари ҳам Самарқандда пайдо бўлиши мумкин.
Изоҳ (0)