Ivuarlik futbolchi Yaya Ture milliy terma jamoa bilan xayrlashgani haqida o‘z sayti orqali ma’lum qildi, deb yozdi “TASS”. U Kot-d’Ivuar uchun so‘nggi 14 yil davomida 113 ta o‘yin o‘tkazib, 19 ta gol urishga muvaffaq bo‘lgandi.
“Manchester Siti”ning 33 yoshli a’zosi bu haqday shunday dedi: “Bu hayotim davomida qabul qilgan qarorlarim orasida eng qiyini bo‘ldi. 14 yil yuqori saviyada to‘p surganimdan so‘ng hozir shu qarorda to‘xtalishning ayni fursati ekanini his qildim. Men endi 33 yoshdaman. Bu o‘yinlar sonining va mashg‘ulotlarning ko‘pligi bilan o‘lchanmaydi”.
2015-yil Ture Kot-d’Ivuarning Afrika Millatlar Kubogida g‘olib chiqishiga o‘z hissasini qo‘shgandi. Bundan tashqari u va uning vatandoshlari mazkur musobaqa finaliga ikki marta yetib borgan. 2011, 2012, 2013 va 2014-yillar davomida Yaya qit’aning eng yaxshi futbolchisi uchun atalgan sovrinni hech kimga bermagan.
Yaya Ture 2003—2005-yillar davomida Ukrainaning “Metallurg” klubi sharafini himoya qilgani uchun o‘z fikrini rus tilida ham tushuntira oladi. 2007—2010-yillar davomida “Barselona” sharafini himoya qilgan futbolchi, o‘z klubi bilan barcha sovrinlarni qo‘lga kiritdi: ikki marta Ispaniya chempioni, mamlakat Kubogi va Superkubogi sohibi, Yevropa Chempionlar Ligasi g‘olibi, Yevropa Superkubogining egasi, klublar o‘rtasidagi Jahon Chempionati bosh sovrindori.
2010-yildan buyon Yaya Ture Angliyaning “Manchester Siti” klubi a’zosi hisoblanadi. U amaldagi klubi bilan ikki bor mamlakat chempionligini tantana qildi. Bir marta Angliya Kubogini, ikki marta Liga Kubogini, shuningdek, inglizlar Superkubogini qo‘lga kiritib ulgurdi.
Qayd etish kerak, Xosep Gvardiolaning “Siti”ga tashrifidan keyin Ture zaxira futbolchisiga aylanib qoldi. Joriy mavsum davomida u birorta ham o‘yinda ishtirok etmadi. Qo‘shimchasiga “Siti”ning Chempionlar Ligasi uchun ro‘yxatiga kiritilmagan.
Izoh (0)