Ивуарлик футболчи Яя Туре миллий терма жамоа билан хайрлашгани ҳақида ўз сайти орқали маълум қилди, деб ёзди «ТАСС». У Кот-д’Ивуар учун сўнгги 14 йил давомида 113 та ўйин ўтказиб, 19 та гол уришга муваффақ бўлганди.
«Манчестер Сити»нинг 33 ёшли аъзоси бу ҳақдай шундай деди: «Бу ҳаётим давомида қабул қилган қарорларим орасида энг қийини бўлди. 14 йил юқори савияда тўп сурганимдан сўнг ҳозир шу қарорда тўхталишнинг айни фурсати эканини ҳис қилдим. Мен энди 33 ёшдаман. Бу ўйинлар сонининг ва машғулотларнинг кўплиги билан ўлчанмайди».
2015 йил Туре Кот-д’Ивуарнинг Африка Миллатлар Кубогида ғолиб чиқишига ўз ҳиссасини қўшганди. Бундан ташқари у ва унинг ватандошлари мазкур мусобақа финалига икки марта етиб борган. 2011, 2012, 2013 ва 2014 йиллар давомида Яя қитъанинг энг яхши футболчиси учун аталган совринни ҳеч кимга бермаган.
Яя Туре 2003—2005 йиллар давомида Украинанинг «Металлург» клуби шарафини ҳимоя қилгани учун ўз фикрини рус тилида ҳам тушунтира олади. 2007—2010 йиллар давомида «Барселона» шарафини ҳимоя қилган футболчи, ўз клуби билан барча совринларни қўлга киритди: икки марта Испания чемпиони, мамлакат Кубоги ва Суперкубоги соҳиби, Европа Чемпионлар Лигаси ғолиби, Европа Суперкубогининг эгаси, клублар ўртасидаги Жаҳон Чемпионати бош совриндори.
2010 йилдан буён Яя Туре Англиянинг «Манчестер Сити» клуби аъзоси ҳисобланади. У амалдаги клуби билан икки бор мамлакат чемпионлигини тантана қилди. Бир марта Англия Кубогини, икки марта Лига Кубогини, шунингдек, инглизлар Суперкубогини қўлга киритиб улгурди.
Қайд этиш керак, Хосеп Гвардиоланинг «Сити»га ташрифидан кейин Туре захира футболчисига айланиб қолди. Жорий мавсум давомида у бирорта ҳам ўйинда иштирок этмади. Қўшимчасига «Сити»нинг Чемпионлар Лигаси учун рўйхатига киритилмаган.
Изоҳ (0)