Pokemon Go o‘yini muxlislaridan mablag‘ to‘plash tezligi bo‘yicha mutlaq rekord o‘rnatdi. Bu haqda “RBK” xabar bermoqda.
O‘yinning o‘zi smartfonlarga bepul ko‘chirib olinadi va o‘rnatiladi. Biroq o‘yinga yordam beruvchi qo‘shimcha buyumlarni (pokemonlar uchun tuzoqlar, ularni tutishga yordam beradigan pokebollar, tuxumlar uchun inkubatorlar va hokazo) pulga xarid qilish mumkin. O‘yin taqdim etilganidan 60 kun o‘tib butun dunyo bo‘ylab o‘yinchilar ular uchun Google Play va iOS App Store’da 500 million dollar sarfladi.
Bu boradagi avvalgi yetakchi — Activision Blizzard kompaniyasining Candy Crush Saga o‘yini 500 million dollar to‘plashi uchun yetti oyga yaqin vaqt ketgandi. Yana ikki ommalashgan o‘yin — Puzzle & Dragons va Clash of Clans bu ko‘rsatkichga 400 kundan oshiqroq muddatda erishgan.
App Annie hisobotiga ko‘ra, Pokemon Go erishgan rekord natija tahlilchilarning 2016-yil oxirigacha o‘yindan keladigan tushum 1 milliard dollardan oshishi haqidagi taxminini tasdiqladi.
Izoh (0)