Pokemon Go икки ойда 500 млн доллар тўплаб, мутлақ рекорд ўрнатди

Pokemon Go ўйини мухлисларидан маблағ тўплаш тезлиги бўйича мутлақ рекорд ўрнатди. Бу ҳақда «РБК» хабар бермоқда.

Ўйиннинг ўзи смартфонларга бепул кўчириб олинади ва ўрнатилади. Бироқ ўйинга ёрдам берувчи қўшимча буюмларни (покемонлар учун тузоқлар, уларни тутишга ёрдам берадиган покеболлар, тухумлар учун инкубаторлар ва ҳоказо) пулга харид қилиш мумкин. Ўйин тақдим этилганидан 60 кун ўтиб бутун дунё бўйлаб ўйинчилар улар учун Google Play ва iOS App Store’да 500 миллион доллар сарфлади.

Бу борадаги аввалги етакчи — Activision Blizzard компаниясининг Candy Crush Saga ўйини 500 миллион доллар тўплаши учун етти ойга яқин вақт кетганди. Яна икки оммалашган ўйин — Puzzle & Dragons ва Clash of Clans бу кўрсаткичга 400 кундан ошиқроқ муддатда эришган.

App Annie ҳисоботига кўра, Pokemon Go эришган рекорд натижа таҳлилчиларнинг 2016 йил охиригача ўйиндан келадиган тушум 1 миллиард доллардан ошиши ҳақидаги тахминини тасдиқлади.