Kuba teri saratonini davolashga mo‘ljallangan yangi Heberferon (“Eberferon”) tibbiy preparatini ro‘yxatdan o‘tkazdi, deya xabar bermoqda “TASS” milliy televideniyega tayanib.
Heberferon Kuba poytaxtidagi Gen injeneriyasi va biotexnologiyalar markazida 20 yillik tadqiqotlar va klinik sinovlardan so‘ng ishlab chiqilgan.
Ishlab chiqishda qatnashgan biolog Iraldo Belyo so‘zlariga ko‘ra, dori vositasi Kuba ilmiy markazida gen injeneriyasi yordamida ishlab chiqariladigan interferon alfa va interferon gammani o‘z ichiga oluvchi komponentlarning “dunyodagi noyob tarkibi”dan iborat.
Inyeksiya orqali kiritiladigan dori teridagi melanomadan tashqari barcha shishlarni kichraytiradi va odam yuzida jarrohlik operatsiyasini o‘tkazish zaruriyatidan qochish imkoniyatini beradi.
Gen injeneriyasi va biotexnologiyalar markazida yangi preparatning 10 mingdan ortiq ampulasi ishlab chiqarildi. Dori hali ishlab chiqish bosqichida bo‘lib, uning boshqa saraton kasalliklarini davolashdagi samaradorligi tekshirilmoqda.
Izoh (0)