O‘zbekiston termasi mustaqillikning 25 yilligi uchun, Suriya esa mamlakatdagi siyosiy qiyinchilik uchun zafar quchmoqchi

JCh—2018 3-saralash bosqichining 1-turida to‘qnash keladigan O‘zbekiston va Suriya terma jamoalari rasmiylari 1-sentabr kuni bo‘lib o‘tadigan o‘yindagi g‘alaba nima uchun kerakligiga oydinlik kiritdi.

Bellashuvdan bir kun oldin — 31-avgust kuni tashkil etilgan matbuot anjumanida ishtirok etgan O‘zbekiston milliy terma jamoasi bosh murabbiyi Samvel Babayan mamlakat mustaqilligining 25 yillik bayrami uchun g‘alaba qozonishni istayotgani haqida aytib o‘tgandi.

Matbuot anjumanining ikkinchi qismida ishtirok etgan Suriya terma jamoasi sardori Abdulrazzoq Hussayn esa mamlakatda yuzaga kelgan siyosiy qiyinchiliklar tufayli g‘alaba qozonishga urinishlarini ma’lum qildi.

“Ertaga qiyin o‘yin kutib turibdi. Bu bosqich biz uchun katta sinov. Mamlakatda yuzaga kelgan siyosiy qiyinchiliklar tufayli ham ertaga g‘alaba uchun harakat qilamiz”, — dedi Abdulrazzoq Hussayn.

Suriya terma jamoasi bosh murabbiyi Ayman Al-Hakim o‘yin oldidan quyidagi fikrlarni bildirdi: — “O‘zbekiston termasi kuchli raqib. Shunga qaramay bor imkoniyatimizni ishga solamiz. Bu bosqichdagi har bir o‘yin va har bir ochko muhim”.